Category Archives: politics / ፖለቲካ

የሀገርና የሕዝብ ራዕይ አምካኝ

የሴራ ፖለቲካ ቁጥራቸው የማይናቅ ሀገራትን ፖለቲከኞች ቆርጥሞ የበላ በሕዝብና በዴሞክራሲ ላይ የተጋረጠ አደጋ ነው፡፡ ሴራና የሴራ ፖለቲካ ጊዜ ዘመንና ዕድሜው ረዥም መሆኑ ይታመናል። የሰው ልጅ ከተፈጠረበት ወቅት ጀምሮ የነበረና የኖረ ዛሬም ድረስ የቀጠለ ነው፡፡ ሀገራት በሀገራት፤ መንግሥታት በመንግሥታት፤ የፖ ለቲካ ቡድኖች በፖለቲካ ቡድኖች፤ ግለሰቦች በግለሰቦች ላይ በሴራ እየተነሱ የሴራ ፖለቲካን እያራመዱ ሲጠፋፉ ሲተራረዱ ሲበላሉ ኖረዋል።

የሴራ ዋና ምንጩ ግልጽነት አለመኖር፣ ክፋት፣ ምቀኝነት፣ ተንኮል፣ ይበልጠኛል ወይንም ይገዳደረኛል ብሎ የሚያስበውን ግለሰብ ቡድን ወይም ድርጅት ጠልፎ የሚጥልበት ተንኮልና ሴራ ነው፡፡ የሴራ ፖለቲካ ከድሮ እስከ ዘንድሮ ከጫንቃችን አልወረደም፡፡ ሀገርና ትውልድ ገዳይ ነው የሴራ ፖለቲካ፡፡ በሀገራችን ከጥንት ጀምሮ በተለያየ መልኩ ሲከሰት ከፍተኛ ኪሳራና ዋጋ ሲያስከፍለን ለመኖሩ ብዙ ማሳያዎችን ማንሳት እንደሚቻል የፖለቲካ ሳይንስ ምሁራን ይናገራሉ፡፡

ዛሬም ቢሆን የሴራ ፖለቲካ መልኩን እየቀያየረ መከሰቱ አልቀረም፡፡ ሁኔታው ባሰበት እንጂ ለውጥ አልመጣም ሲሉ ምሁራኑ ይሞግታሉ፡፡ የዛሬው ትውልድም ከሴራ ፖለቲካ ተግባር እና ዳፋ አልራቀም፤ ከበሽታውም «አልተላቀቅንም» ሲሉ ምሁራን ይናገራሉ፡፡ በቀደመው ትውልድ ወይንም በያኔው ትውልድ የተለያዩ የፖለቲካ ድርጅቶች የተበላሉበትና የተጠፋፉበት ታሪክ የሴራ ፖለቲካ ልክፍት ነው።

በሴራ ፖለቲካ ምንነት እና ተያያዥ ጉዳዮች ዙሪያ ሁለት ታዋቂ የአዲስ አበባ ዩኒቨርሲቲ ምሁራን የሚሉት አላቸው፡፡ የፖለቲካ ሳይንስ ምሁር ዶ/ር ዳኛቸው አሰፋ እንዲሁም በአዲስ አበባ ዩኒቨርሲቲ የአፍሪካና የኤሽያ ጥናት ኃላፊ ዶ/ር ጌታቸው ካሳ የሴራ ፖለቲካ ምንድነው? በሚለው ነጥብ ዙሪያ አነጋግረናቸዋል፡፡

የሴራ ፖለቲካ ምንድን ነው?

የሴራ ፖለቲካን በሁለት ከፍሎ ማየት ይቻላል የሚሉት ዶ/ር ዳኛቸው ሴራንና ፖለቲካን ነጣጥለው ይመለከቱታል፡፡ የሴራ አስተሳሰብ ማለት ማስረጃ ሳይኖር በደንብ ሳይጠና የተወሰነ ግምታዊ ሀሳብ አምጥተህ መሬት ላይ የሚካሄደውን ነገር በዚያ መግለጽ ማለት ነው። ማሰብ መተንተን ብዙ ያስቸግራል። ሊያምም ይችላል፡፡ ስለዚህ ምንም ሳይጨናነቁ ዝምብሎ እንዲህ ሆኖ እኮ ነው፤ እንዲያ ነው፤ እንዲህ ነበር እኮ፤ እንዲህ ነው በሚል ሴራ ውስጥ ገብቶ ታሪክን የፖለቲካ ሁኔታን በሴራ ላይ ተመስርተህ ፖለቲካን ማስረዳት ማለት ነው። ሴራ ግን ዘለቄታ የሌለው ተኖ የሚጠፋ ነው። ከሴራ ይልቅ በደንብ ነገሮችን መረጃዎችንና ማስረጃዎችን መርምሮ መንቀሳቀሱ የተሻለ ነው ይላሉ ዶ/ር ዳኛቸው፡፡

በአዲስ አበባ ዩኒቨርሲቲ የአፍሪካና የኤሽያ ጥናት ኃላፊ ዶ/ር ጌታቸው ካሳ በበኩላቸው የሴራ ፖለቲካን እንደሚከተለው ይገልጹታል፡፡ የሴራ ፖለቲካ ማለት ግልጽነት የሌለው ፖለቲካ ማለት ነው፡፡ ለምሳሌ ተቀናቃኝ የሆኑ ሁለት የሚገዳደሩ ኃይሎች ካሉ ሀገራዊ በሆነው ነገር ላይ አንዱ ሌላውን የሚጠረጥርበት ማለት ነው።

ምክንያቱም አንዱን ከእኛ ባሕልም አንጻር መውሰድ ይቻላል፡፡ የእኛ ባሕል ምስጢር የሚለው ነገር አለው፡፡ ይሄ ምስጢር ማለት ብዙ ጊዜ ግልጽነት የሌለው ነገር ማለት ነው። ግልጽነት ያለመነጋገሩ ባሕል ስላለ በተለይ ምሁሩ የፖለቲካ ልሂቁና ተማረ የምትለው አካባቢ ችግሩ ነፍስ ዘርቶ ይታያል፡፡

«እኔን ጠልፎ ይጥለኛል» የሚል አስተሳሰብ አለ፡፡ የእምነት ማጣት (ላክ ኦፍ ትረስት)። ምንጊዜም አንድ መንግሥት ሀገርና ሕዝብን ሊመራ የሚችለው ሕዝብ በመንግሥት ወይንም በልሂቃኑ ላይ እምነት ሲኖረው ብቻ ነው። ወይንም ደግሞ መንግሥት በሕዝቡ ላይ እምነት ሲኖረው ነው መምራት እና መመራት የሚቻለው። በዚህ መካከል ያሉት የፖለቲካ ልሂቃን ማድረግ የነበረባቸው እምነትን የሚያመጡ ነገሮችን፤ ሀገር ያላትን ምስል መገንባት የሚታመንበትን ነገር የሚያስተምሩ ዓይነት ሰዎች መሆን ይገባቸዋል፤ ምሁሩ ግን ተመልካች ሆኗል፡፡ ይሄ ሚናው አይደለም፡፡

የሴራ ፖለቲካ በኢትዮጵያ

የሤራ ፖለቲካን በኢትዮጵያ ተጨባጭ ሁኔታ እንዴት ያዩታል? ለሚለው ጥያቄ ብዙ ሰው ሴራውን ሊለቅ አይፈልግም ይላሉ። ቀጥለውም በኢትዮጵያ ውስጥ ይጎድላል ያሏቸውን ሁለት ነገሮች ይገልጻሉ። አንደኛው ክፍት አእምሮ (ኦፐን ማይንድድነስ) ሲሆን ሁለተኛው በማስረጃ ላይ የሚመሰረት (ኢቪደንሸሪ) የሚሉት ነው፡፡

ክፍት አዕምሮ በሚኖርህ ጊዜ የራስህን ሀሳብ መልሰህ እንድትፈትሽ ይረዳሀል፡፡ «አይ እኔ አንድ ጊዜ ይህን አቋም ይዣለሁ ከዚህ ወዲህ የፈለገው ማስረጃ ቢመጣ አልነቃነቅም» ማለት ትክክል አይሆንም፡፡ ሴራ አንዴ ከገባ በኋላ ያንን ማላቀቅ ከባድ ነው፡፡ የፈለከውን ዓይነት ማስረጃ ለሴረኛው ብታመጣ ሌላ እንደገና ሌላ ሴራ ጎንጉኖ ያንን ያፈርስብሀል እንጂ ክፍት አእምሮ ሆኖ ነገሮችን ማስተካከል አይፈልግም ሲሉ ዶክተር ዳኛቸው ያስረዳሉ፡፡

ሴራ በኢትዮጵያ ፖለቲካ ውስጥ ከጥንት ጀምሮ ገኖ የኖረ ነው ለሚለውም መልስ አላቸው ዶ/ር ዳኛቸው፡፡ ሴራ በገለጻ ደረጃ አንድ ነገር ነው፡፡ ሴራ ደግሞ ከኋላ እየተሻረክ በፊት ለፊት ነገሮችን ከማቅረብ በቡድን እየተቧደንክ ፖለቲካን መግፋት ነው፡፡ ይሄ በጣም አደጋ ነው፡፡ ሴራ የሚያስከትለው መጠፋፋት ነው።

ዶ/ር ዳኛቸው ‹ዘ -ፕሪንስ› በተባለ መጽሐፉ ማክያቬሊ የሴራ ፖለቲካን መሠረት የጣለ ነው የሚባለውን ሀሳብ አይቀበሉትም፡፡ ማክያቬሊ ስለሴራ አይደለም ያወራው፡፡ ማክያቬሊ ፖለቲካና ሞራልን እንለይ ነው የሚለው፡፡ «ሪፐብሊኩን ማጽናት ሪፐብሊኩን መጠበቅ ኃላፊነት አለብህ ፤ የምትዳኘው ሪፐብሊኩን በመጠበቅህ ነው እንጂ ሰው በመግደልህ በማጥፋትህ አይደለም፡፡ ለዚህ ስትል ‹ክርስትያን ሞራሊቲ› ሌላ ያደክበትን ሞራል ሽረህ እንደምንም ብለህ ፖለቲካህን መግፋት አለብህ» ነው የሚለው፡፡

ማክያቬሊ ተናግሮ ጨርሷል ነው የሚሉት ዶክተር ዳኛቸው፡፡ «እኔ እንደነ ሶቅራጥስና ጂሰስ ክራይስት ከጨለማ ወደብርሃን አወጣችኋለሁ አልልም፡፡ እንዴት ግን በጨለማ ውስጥ መኖር እንደምትችሉ አስተምራችኋለሁ ነው ያለው፡፡ ይሄ ዓለም ጨለማ ነው፡፡ ዋሻ ነው» ነው ያለው ክርስቶስ፡፡ ሁሉም ከኋላው ጩቤውን ይዟል። እንዴት መኖር እንደምትችሉ ላስተምራችሁ እንጂ ወደ ብርሃን እወስዳችኋለሁ አልልም ብሏል ሲሉ ስለማክያቬሊ ገልጸዋል፡፡

የሴራ ፖለቲካና …

የኃይል አሰላለፍ

የሴራ ፖለቲካንና አሁን በሀገራችን ያለውን የፖለቲካ ሁኔታና መፍትሄ አስመልክተው ዶ/ር ዳኛቸው የሚሉት አለ፡፡ መፍትሄ መስጠት በጣም አስቸጋሪ ነው፡፡ አሁን የመነጋገሪያ ጊዜ ነው የሚል አቋም አላቸው፡፡

«አማራ ክልል ውስጥ ችግር ተፈጥሯል፡፡ ዝም ብለን ጣት ከምንቀሳሰር ተነጋግረን ከዚህ ችግር ተጠናክረን ወጥተን የክልሉ ሕዝብ ለክልሉ ብሎም ለኢትዮጵያ ማበርከት የሚገባውን ድርሻ እንዲጫወት ማድረግ ይገባል ሲሉ ይመክራሉ። ይህን ለማድረግ ሁሉም ቤቱን ማስተካከል፤ መወያየት አለበት፡፡ መገፈታተር የለበትም፡፡ በመጀመሪያ መገዳደሉን መተው፡፡

«እኔ የምለው በእንደዚህ ዓይነት አካሄድ መሄድ አለብን ባይ ነኝ፡፡ የአማራ ክልል ሕዝብ በሳል ነው። መሸማገል ፤ መምከርም ያውቅበታል፡፡ የአማራ ባሕል የምክክር ቤት ነው፡፡ እነዚህን እሴቶቻችንን ተጠቅመን ወደ በጎ ነገር መሄድ ነው የሚገባን» ሲሉ ዶክተሩ ይመክራሉ፡፡

በኢትዮጵያ የሴራ ፖለቲካና ጽንፍ የወጣ የኃይል አሰላለፍ በግልፅ ይታያል፡፡ ለኢትዮጵያ የትኛውም ዓይነት ጽንፈኛ አካሄድ ምንጊዜም አይበጃትም የሚሉት ዶክተር ዳኛቸው ማዕከላዊነት ይበጃል ነው የሚሉት፡፡ በአማራ ክልል ውስጥ ኢትዮጵያን የሚመለከት ሥራ ስትሰራም ሆነ ስታቅድ ለአማራ ሕዝብ ብቻ ሳይሆን ሌሎች ብሔር ብሔረሰቦችንም ታሳቢ ማድረግ ይገባል፡፡ የአማራን ጥቅም ብቻ ነው የምጠብቀው በምትልበት ወቅት የሌላውን ጥቅም ታጎድላለህ ይህ ደግሞ ዘላቂ አይሆንም፤ እንዲያውም ለግጭት መንስኤ ይሆናል፡፡

«የአማራውን ጥቅም አስከብራለሁ ስትል የሌላውንም ጥቅም ስታስከብር ነው አላማህን የምታሳካው፡፡ ተነጣጥሎ የሚሄድ አይደለም። የአሉት መሪዎች እየተመካከሩ እኛም እንደ አቅማችን እየመከርናቸው ወደ መልካም መንገድ እንሄዳለን የሚል ተስፋ አለኝ» ብለዋል ዶ/ር ዳኛቸው፡፡

የምሁራንና የወጣቱ የቤት ሥራ

ዶ/ር ጌታቸው ካሳ ሁኔታውን ሰፋ አድርገው አብራርተዋል፡፡ ጽንፍ የያዘው ሌላው ምሁር ደግሞ መገንጠል ነው የሚሰብከው። በአፍሪካ ቀንድ በሙሉ ከሄድክ የጎሳውን ታሪክ የማጉላት ታሪክ እንጂ ሀገርን እንዴት አድርገን እንፈጥራለን የሚለው ላይ በምሁሩ መካከል ስምምነት አልነበረም፡፡ ስለዚህ ርዕዮተ ዓለምም ብትለው አርቲፊሻል ጉዳይ ነው፡፡ ከጎሳ አስተሳሰብ አልወጣም፤ አልመጠቀም፡፡

ዓለም ዓቀፋዊ የሆነ (ግሎባል) አስተሳሰብ፤ ከባቢያዊ የሆነ ሁኔታ ሀገራዊ አንድነትን የሚያስብ አልነበረም፡፡ የጻፈው ሁሉ ጽንፍ የወጣ ነው፡፡ ምሁሩ ወይ የአማራውን ወይ የኦሮሞውን ወይ የትግሬውን ታሪክ ነው የሚያወራው። የመገንጠል ታሪክ ነው የሚያ ወራው፡፡ መገነጣጠል፡፡ ጽሑፎቹን ሁሉ ማየት ትችላላህ።

«በጋራ የሚያቆመን ነገር ላይ ሳይሆን በሚለያየን ነገር ላይ ነው ሲጽፉ ሲሰሩ የኖሩት። ሀገርን እንዴት አድርገን እንፍጠራት የሚለው ላይ ምሁሩም መካከል ስምምነት አልነበረም። የለም። ምሁሩ በአብዛኛው አንድነትን የሚያመጣ ነገር ላይ አልጻፈም፡፡ አልሰበከም። ይህቺ ሀገር ለሁላችንም ትበቃለች በሚል አይደለም የሰሩት ሲሉ» ዶ/ሩ ይወቅሳሉ፡፡

ወጣቱን ትውልድ በተመለከተ ዶ/ር ዳኛቸው የሚሉት አላቸው፡፡ ወጣትነት በጣም አስቸጋሪ ዘመን ነው፡፡ ወጣቱ ምክር ማዳመጥ አለበት፤ መጠየቁን የፖለቲካ ንቃቱን ይቀንስ አይባልም። ነገር ግን በጣም ረጋ ማለት አለበት። መረጋጋት አለበት። ሽማግሌዎች የሚሉትን መስማት፤ ልንሳሳት እንችላለን ብሎም እንዲያስብ ነው የሚፈለገው፡፡ መሳሳት አለ፤ ይኖራል የሚል ብሂል ማሳደግ አለበት እንጂ «እኔ ልክ ነኝ ፤ያለቀ ነገር ነው» የሚለው ትክክል አይደለም፡፡ከዚህ መውጣት አለበት፡፡

ለምሁራን ብቻ

ምሁራን ለሁሉም የጋራ በሆኑ ነገሮች ላይ መስራት ነበር የሚገባቸው፡፡ አሁን ግን የሚታየው ውድድር ነው፡ ፡ምስጢር ይበዛል፤ግ ልጽነት የለም። መጠላለፍ አለ፡፡ ስለዚህ እርስ በእርስ፤ በቡድንም ውስጥ ያለመተማመን አለ። ይሄ መሠረቱ ምንድነው ካልን በሕዝብና በፖለቲካ ልሂቃኑ መካከል ያለው ወጥ ያልሆነ አስተሳሰብ ወይም ፍትሀዊ የሆነ አስተሳሰብ የለም ብሎ ለመናገር ብዙ ማሳያዎች አሉ ይላሉ ዶክተር ጌታቸው፡፡

ማሸነፍ ያለብህ ግልጽ በሆነ አጀንዳ ላይ ተከራክረህ ነው፡፡ ነገር ግን አብዛኛው ምሁር የዜሮ ድምር ውጤት ውስጥ ስላለ ብዙ ጊዜ የፖለቲካ አወቃቀሩም የዜሮ ድምር ፖለቲካ ይሆናል፡፡ እስከመጨረሻው ሄደህ አጥፍተኸው ነው ሥልጣን የምትወስደው፡፡ ይሄ በሕዝቡ፤ በጎሳዎችም ሆነ በየደረጃው ባለው ፖለቲካና ፖለቲከኞች ውስጥ ጎልቶ ይታያል ይላሉ ዶ/ር ጌታቸው፡፡

አብዛኛው የፖለቲካ አመራሩ በመጠፋፋት ነው የሚያምነው፡፡ አንዱ ሌላውን በመጣል እንጂ በማሳመን የጋራ ግብ ኖሮአቸው ላለመስማማት መስማማት ስለሌለ ነው ፖለቲካዊ ሴራ ሁልጊዜም የሚኖረው፡፡ የግልጽነት አለመኖርና ማጣት ነው የሴራ ፖለቲካ በትክክል ይህን የመሰለ ገጽታ እንዲኖረው ያስቻለው፡፡ ለሴራ መኖር የሴረኞች መኖር አንዱ ምክንያት ነው፡፡

እንደ ዶ/ር ጌታቸው ማብራሪያ በኢትዮጵያ የፖለቲካ ትግል ውስጥ ከቀድሞ ዘመናት ጀምሮ ምሁሩና ተማሪው ስርነቀል አብዮት ለማምጣት ታግሏል፡፡ በሴራ ፖለቲካ ተጠላልፎ መክኖ መቅረቱን በተመለከተ ዶ/ሩ የራሳቸውን አተያይ ይገልጻሉ፡፡ የአፍሪካ ቀንድ በተለይ ምሁራንን በአጠቃላይ ከወሰድክ ከትርክት አልወጡም፡፡ የማያባራ መሠረት የሌለው ትርክት፡፡

አፈታሪክን ይሄ ነገር ትክክለኛ ታሪክ ላይሆን ይችላል ብለው እሱን አጥርተው አላጠሩም። ጥላቻ አለ፡፡ (ፕሬጂዱሲስ) አንዱ ለሌላው ያለውን አመለካከት ጽንፋዊ የሆነውን ይሄ ጠላቴ ነው ፤ይሄኛው እንደዚህ ነው፤ ዶሚኔት አድርጎኛል የሚባለው ትርክት ስላለ ምሁሩ ከዚህ ትርክት አልወጣም፤ ዛሬም ተቀፍድዶ እንደተያዘ ነው ይላሉ ዶክተር ጌታቸው፡፡

ርዕዮተዓለሙ ልባስ ዓይነት ነገር ነው። መሸፈኛ፡፡ ያለውን ትክክለኛ አቋም ከዚህ በላይ ልቆ ያሰበበት ጊዜ የለም፡፡ አንዱ ሌላውን በማጥፋት የሥልጣንና የራሱን የጥቅም የሚያስከብር ቡድን ማምጣት ላይ ስለነበረ ሴራው ያ ችግር አለ፡፡ አሁንም መጠየቅ የሚገባው ትልቁ ነገር ምንድነው ምሁሩ ከጎሳ አስተሳሰብ አልወጣም፡፡ የ1960ዎቹም ትውልድ ሀገራዊ አንድነት የሚለው ጽንፍ ይዞ የሄደው የኢትዮጵያ አንድነት ወይ ሞት የሚለውም አስተሳሰብና ቡድን አለ፡፡

ይሄም አግባብ አይደለም የሚሉት ዶ/ር ጌታቸው እሱን ደግሞ እንዴት አድርጎ እንደሚ ያመጣ ያስረዳበት ጊዜ የለም፡፡ እንዴት አድርገን ነውአንድነታችንን የምናመጣው በሚለው ላይ አልተ ሰራበትም፡፡ ከታች ከባሕላችን ጀም ረን ሁሉንም የማቀፉን ሌላውን የማግለሉን ነገር በማቆም እንዴት ነው ሀገራዊ አንድነት የም ናመጣው በሚለው አስተሳሰብና የሀገር ግንባታ ላይ ምንም ጥሩ ነገር አልነበረውም ሲሉ ዶ/ር ጌታቸው ያስረዳሉ፡፡

መፍትሄው ምንድነው?

«በእኛ ዘመን እኛ ልንሳሳት እንችላለን ብለን ስላላልን ጥፋት ደርሷል፡፡ አሁን ያለው ወጣት የእኛን የ1960ዎቹን ያንን እንዳይደግም ነው የምለው፡፡ ቀኖናዊ ነበርን፡፡ ዶግማቲክ ነበርን። መሀላችን ልንሳሳት እንችላለን ይሄን ነገር እስቲ እንፈትሸው አላልንም ነበር፤ በዚህም ብዙ ጥፋት መጣ፡፡ መግባባት፡፡ መደማመጥ። የራስን ሀሳብ ደግሞ ደጋግሞ መፈተሽ ተገቢ ነው» ሲሉ ዶክተር ዳኛቸው ሀሳባቸውን ሰንዝረዋል፡፡

ዶ/ር ጌታቸው የሚሉት አላቸው፡፡ አሁን ካለው በላይ የሚሄድ የሚሻገር የገዘፈ ሀገራዊ ራእይ ያስፈልጋል፡፡ አንደኛው ምሁሩ ከኋላቀር የአስተሳሰብ ባርነት ነፃ መውጣት አለበት፡፡ ፖለቲካውን የሚያርቀው (ማረቅ) የሚችለው የሚገባውም እኮ እሱ ነበር፡፡ በፊት የነበረውን እስከአሁን ያለውንና የነበረውን ሀገራችን ያለችበትን ሁኔታና ቀውስ በመፍጠር ረገድ ምሁሩ ነው አስተዋጽኦ ያደረገው፡፡

ምሁሩ ኅብረተሰቡን ለመቅረጽ አልበቃም። ምሁሩ ከኅብረተሰቡ በአስተሳሰብ ቀድሞ ልቆ መጥቆ አልሄደም፡፡ ልቆም ሄደ ካልከው የያዘው መለያ ርዕዮተዓለም ግዙፍና ሀገርን ወደትልቅነት የሚያሻግር አይደለም፡፡ ከትንንሽ አስተሳሰብ አልወጣም፡፡ ስለዚህ ሀገራዊ ፖለቲካችንን ለማረቅ ከተፈለገ የፖለቲካ ልሂቁና ተማረ የሚባለው ኃይል ሰፋ አድርጎ የሚያስብና ሕዝቡን የሚያቀራርብ ከዚያ በላይ መማር ያለበት እስከአሁን የሄድንበት አንዱ ሌላውን አቅፎ የኖረበትን ፖለቲካ ማምጣት አለበት። ሁለተኛው በውይይት ማመን ነው። በውይይት የማመኑ ነገር ታች ስንወርድ ኅብረተሰቡ አካባቢ አለ፡፡

«በእኛ ሀገር ስትወስደው አንዱ እንዴት አድርጎ የአንዱን ሀሳብ እንደሚጥል እንጂ የሚያሰላው ከእሱ ውስጥ የሚጠቅሙ ሀሳቦች ስላሉ ለጊዜው ባንስማማ እንኳን ተስማምተን እንሂድ የሚል የላቀ አስተሳሰብ የለውም ምሁሩ፡፡ አሁን እንዳልኩህ አንዱ ስለ ሌላው ለማብራራት ከዚያ በላይ ሄዶ ያንን ለመገመት የሚያስችለውን ለማድረግ በጽሑፍ በጥናት ምርምር አድርጌ በሚል ሳይሆን ከዚያ በላይ የሚሄድና አንዱ ለሌላው ያለውን ጥርጣሬ ጥላቻ አንዱ በሌላው ላይ ያለውን የጠላትነት መንፈስ ማለዘብ መቻል ነበረበት፤ ይህ አልሆነም፤ አልለዘበም፡፡ ልዩነቱን ነው ሲያጎላ ሲያገዝፍ የመጣው፡፡ የኖረው፡፡

የሚጠናው ጥናት ውድቀት ላይ እና ለምን ኅብረተሰቡ ተለያየ የሚል ላይ ነው እንጂ የሚቀራረብበት ነገር አለ ወይ? የሚለው ላይ አንድም አልተሰራም ሲሉ ዶክተር ጌታቸው ይወቅሳሉ፡፡ ይሄ ችግር ሁሉ ሊፈታ ይገባል። የሴራ ፖለቲካ ለሀገርና ለሕዝብ ውድቀት እንጂ ትሩፋት የለውም ሲሉ ሀሳባቸውን ያጠቃልላሉ።

አዲስ ዘመን ሐምሌ 11/2011

ወንድወሰን መኮንን

ባህርዳር በነዋሪዎቿ አንደበት

 “የክልላችንን ፕሬዚዳንት ጨምሮ ከፍተኛ ባለስልጣናት የመገደላቸውን ዜና ከሰማሁ በኋላ ስጋት አድሮብኝ ነበር፡፡ከተማዋም ሆነች ክልሉ በአጭር ጊዜ ይረጋጋል የሚል እምነት አልነበረኝም፡፡ጦርነት የሚከሰት መስሎኝ ነበር፡፡ ነገር ግን እንደፈራሁት አልሆነም፡፡በአሁኑ ወቅት ከተማዋም ሆነ ክልሉ ሰላም የሰፈነበት ነው” ሲል ያብራረው የባህርዳር ከተማ ነዋሪ ወጣት ዮሴፍ ተስፋዬ ነው፡፡

ሰኔ 15 ቀን 2011 ዓ.ም ከአማራ ክልል መዲና ባህርዳር የተሰማው ዜና እጅግ ዘግናኝ ነበር፡፡ የአማራ ክልል አስተዳዳሪ ዶክተር አምባቸው መኮንንን ጨምሮ ሌሎች የክልሉ ባለስልጣናት ላይ በተፈጸመባቸው ጥቃት ህይወታቸው ማለፉ የሚታወስ ነው፡፡ከተማዋ ክልሉ እንዲሁም ሀገሪቱ ወደ አስከፊ ሁኔታ እንዳትሸጋገር በሚል በርካቶች ስጋታቸውን ሲገልጹ ነበር፡፡

በአሁኑ ወቅት ከተማዋ ስላለችበት ሁኔታ አስተያየታቸውን ለአዲስ ዘመን ጋዜጣ ከሰጡት የከተማዋ ነዋሪዎች መካከል ወጣት ዮሴፍ አንዱ ነው፡፡ከጓደኞቹ ጋር በእግር በመጓዝ ላይ ሆኖ ነበር የተኩስ ድምፅ የሰመው፡፡የተኩስ ልውውጡ እየበረከተ ሲመጣ ግን ወደ ቤቱ አቅንቶ ቴሌቪዥን እንደከፈተ እና በቴሌቪዥን መስኮት ሲተላለፍ ነበረው ዜናም እጅግ እንዳስደነገጠው ይናገራል፡፡

11-130-696x156.jpg

“ዜናውን ስሰማ ከተማዋ የጦርነት አውድማ ሆና መቅረቷ ነው የሚል ስጋት አድሮብኝ ነበር፤ ከተማዋ በአጭር ጊዜ ወደ ሰላሟ በመመለሷ እጅግ ደስተኛ ነኝ፤ ከተማዋ ወደ ሰላሟ ልትመለስ የቻለችው የመንግሥት ጸጥታ ኃይልና የከተማዋ ህዝብ ባደረገው ጥረት ነው፡፡ይህም የከተማዋን ህዝብ ሰላም ወዳድነትና ስልጡንነት አመላካች ነው” ሲልም አስተያየቱን ሰጥቶናል ወጣት ዮሴፍ፡፡

የሆቴል ባለሙያው አቶ እስቲበል ደርሶ በበኩላቸው፤ ችግሩ ከተከሰተበት ዕለት አንስቶ ስለባህርዳር ከተማ ሲወራ የነበረው ከእውነታው የራቀ ነበር ይላሉ፡፡በጥቃቱ ማግስት በእግራቸው በመዟዟር ከተማዋን መቃኘታቸውንና ህዝቡ ኀዘንና ቁጭት ውስጥ መሆኑን ከሚያሳዩ አንዳንድ ስሜቶች በዘለለ ከተማዋ እጅግ ሰላማዊ እንደነበረች ተናግረዋል፡፡“ሁሉም ዓይነት እንቅስቃሴዎች ነበሩ፡፡የግልና የመንግሥት አገልግሎት መስጫ ተቋማትም አገልግሎታቸውን ሲሰጡ ነበር” ብለዋል፡፡

“ህዝቡ በአሉባልታዎች ባለመነዳት፣ ራሱንና አካባቢውን ነቅቶ መጠበቅ በመቻሉ የከተማችን ሰላም አልደፈረሰም” የሚሉት አቶ እስቲበል፤ በጥቃቱ ዙሪያ ግልጽ ያልሆኑን እርስ በእርሳቸው የሚጣረሱ መረጃዎች በህዝብና በመንግሥት መካከል የነበረው መተማመን እንዲደፈርስ አድርጓል ብለዋል፡፡ይህም ህዝቡን ለውዥንብር መዳረጉንና አሁንም ቢሆን በጉዳዩ ዙሪያ ግልጽ የሆኑ መረጃዎች ለህዝቡ ሊደርሱ ይገባል ብለዋል፡፡

ሌላኛዋ የከተማዋ ነዋሪ ፋርማሲስት ፈለገወርቅ አሰፋ በበኩላቸው፤ ግልጸኝነት የሌለበትና በሃሳብ የበላይነት ላይ ያልተመሰረተ ፖለቲካ ለክልሉ ብሎም ለሀገሪቱ ትልቅ ሥራ ይሠራሉ ተብሎ ተስፋ የተጣለባቸውን የህዝብ መሪዎች እንዲቀጠፉ አድርጓል፡፡ሀገሪቷ ውድ መሪዎቿን እንድታጣም ምክንያት ሆኗል፡፡ዳግም መሰል ችግር እንዳይፈጠር ግልጽነትና በሃሳብ የበላይነት ላይ የተመሰረተ ፖለቲካ ማራመድ ያስፈልጋል ይላሉ፡፡

እንደ ፈለገወርቅ ገለጻ፤ በተለይም ለህዝብ ጥቅም የሚሠሩ አመራሮች ግልጸኝነት የተሞላበት ፖለቲካ በማካሄድ ለህዝቡ አርዓያ ሊሆኑ ይገባል፡፡መንግሥት የሚያደርገው እንቅስቃሴ ብቻውን ችግሮችን አይቀርፍም፡፡ህዝቡ ለራሱ ብቻ ከማሰብ ወጥቶ ለሀገር አስተዋጽኦ ማበርከት እንዳለበት ማሰብ ይጠበቅበታል፡፡ለሀገር ያለውን ፍቅር በቃል ብቻ ከመግለጽ ወጥቶ በተግባር ማሳየት አለበት፡፡

በከተማዋ በሹፍርና ሙያ የሚተዳደሩት አቶ ፈቃደሥላሴ እሸቱ በበኩላቸው እንደገለጹት መንግሥት የህግ የበላይነት በማስከበር ረገድ ድክመቶች ይታዩበታል፡፡መንግሥት የህግ የበላይነትን ለማስከበር ምንም ሊያመነታ አይገባም፡፡ መብት ነው ተብሎ ሁሉም ነገር ልቅ መደረጉ ሀገሪቷን ዋጋ እያስከፈላት ነው፡ ፡የህዝቡን ግንዛቤ በማሳደግ ረገድ የሚሠሩ ሥራዎች ሳይሠሩ ሁሉንም ነገሮች ልቅ ማድረግ ተገቢ አይደለም፡፡ መንግሥት ህግን የማስከበር ተግባሩን በአግባቡ ሊወጣ ይገባል፡፡መንግሥት ህግ ማስከበር ላይ ያለውን ውስንነቶች ማስተካከል ከቻለ ብዙ ችግሮችን መቅረፍ ይቻላል ይላሉ፡፡

አቶ ፈቃደሥላሴ እንደሚሉት መንግሥት ሀሉንም ነገር የሚያይ ዓይንና የሚሰማ ጆሮ ሊኖረው አይችልም፡፡በመሆኑም መንግሥት ሰላምን ለማስከበር የሚያደርገውን ጥረት ህዝቡ ሊያግዝ ይገባል፡፡መንግሥት ማስተካከል ያለበትን ነገሮች ማስተካከል የሚችለው ከህብረተሰቡ በሚሰጥ ጥቆማና አስተያየት ነው፡ ፡ለሰላም ጸር የሚሆኑ እንቅስቃሴዎች ሲኖሩ ለፖሊስና ለጸጥታ አካላት በመጠቆም የበኩሉን ሊወጣ ይገባል፡፡  

አዲስ ዘመን ሐምሌ 15/2011

 መላኩ ኤሮሴ

የተሳሳተ ትርክት ያመከነ መሪ!!

• በተሳሳቱ ትርክቶች አንድን ህዝብ መፈረጅ ተገቢ አለመሆኑም ተጠቁሟል

ባህር ዳር፡- የአማራ ክልልና ሱማሌ ክልል ህዝቦች የህዝብ ለህዝብ ግንኙነት መድረክ በአማራ ህዝብ ዙሪያ ያለውን የተዛበ ትርክት በማጥራት እውነታውን ለማስገንዘብ እገዛ እንደሚኖረው የአማራ ክልል ምክትል ፕሬዚዳንት አስታወቁ፡፡

ስለአማራ የተሳሳቱ ትርክቶች የህዝቦችን አብሮነትና ሀገራዊ አንድነቱን የሚጎዱ በመሆናቸው አንድን ህዝብ በጅምላ መፈረጅ ተገቢነት የሌለው መሆኑንም የሱማሌ ክልል ምክትል ርዕሰ መስተዳድር ጠቁመዋል፡፡

የአማራና ክልልና የሱማሌ ክልል ህዝቦች የህዝብ ለህዝብ ግንኙነት መድረክ በባህርዳር ተካሂዷል፡፡ በመድረኩ ላይ ንግግር ያደረጉት የአማራ ክልል ምክትል ፕሬዚዳንት አቶ ላቀ አያሌው እንደተናገሩት በኢትዮጵያ ውስጥ የአማራ ህዝብ ጨቋኝ ተደርጎ ተስሏል፡፡ ይህ ግን የተሳሰተ ትርክት ነው፡፡ የአማራ ህዝብ ከሁሉም ብሄር ብሄረሰቦች ጋር ተከባብሮና ተዋዶ የሚኖር ህዝብ እንጂ ጨቋኝ አይደለም፡፡

ይህ የተሳሳተ ትርክት እንዲስተካከል የሱማሌ ክልል ምክትል ፕሬዚዳንት መልካም ሚና እየተጨወቱ ናቸው፡፡ በሁለቱ ክልል ህዝቦች መካከል የተደረገው የህዝብ ለህዝብ የውይይት እውነታውን ለማስገንዘብ ምቹ ሁኔታ ይፈጥራል ብለዋል፡፡

በሶማሌ ክልል ባለፈው ዓመት ግጭት የወደሙ ቤተክርስቲያኖችን መልሶ በማስገንባት ረገድ የክልሉ መንግሥት የፈጸመው ተግባር በአርዓያነት የሚጠቀስ ነው ያሉት አቶ ላቀ፤ በክልሉ የሚኖሩ የአማራ ብሄር ተወላጆች መብታቸው ተከብሮ እንዲኖሩ የክልሉ መንግሥት እየወሰደ ያለው ተግባራዊ ዕርምጃ የሚደነቅ ነው ብለዋል፡፡

mustafi.jpg

እንደ አቶ ላቀ ማብራሪያ ሁለቱ ህዝቦች ከመቼውም ጊዜ በላይ ግንኙነታቸውን በማጠናከር ሀገረ መንግሥት ግንባታ ላይ በጋራ ሊሠሩ ይገባል፡፡ ለዚህም የአማራ ህዝብና የክልሉ ዝግጁ መሆኑን አብራርተዋል፡፡

የሱማሌ ክልል ምክትል ፕሬዚዳንት አቶ ሙስጠፌ መሃመድ በበኩላቸው፤ ስለአማራ የተሳሳቱ ትርክቶች የህዝቦችን አብሮነትና ሀገራዊ አንድነቱን የሚጎዱ በመሆናቸው አንድን ህዝብ በጅምላ መፈረጅ ተገቢነት የሌለው መሆኑን አንስተዋል፡፡

ኢትዮጵያ የበርካታ ብሄር ብሄረሰቦች ባህልና ታሪክ የሚገኝባት የብዝሃነት ስብጥር የሚስተዋልባት ሃገር መሆኗን ያነሱት አቶ ሙስጠፌ ብሄራዊና ሃገራዊ ማንነት አንዱ የሃገሪቱ ደጀን እና ዋልታ መሆኑን በመገንዘብና በጋራ በማስተሳሰር የህዝቦችን ሐተጠቃሚነት ማረጋገጥ ይገባል ብለዋል።

የጋራ እና ብሄራዊ ማንነት ተፈጥሯዊ ተቃርኖ እንዳላቸው በማስመሰል የብሄር ፅንፈኝነት በመፍጠር የሃገርን ሰላም የሚያውኩ አካላትን እያንዳንዱ ግለሰብ በያገባኛል መንፈስ ሊከላከላቸው ይገባልም ብለዋል።

በመድረኩ የባህርዳር ዩኒቨርሲቲና የጂግጂጋ ዩኒቨርሲቲ ምሁራን ለዘመናት የቆየውን የሁለቱን ህዝቦች አብሮነትና ለሀገር አንድነት ብሎም ሉዓላዊነት መከበር ያበረከቱትን አስተዋጽኦ የሚዳስሱ ጽሐፎችን አቅርበዋል፡፡

የባህር ዳር ዩኒቨርሲቲ ምሁሩ ዶክተር ዋጋው ቦጋለ፤ “የኢትዮጵያ ሱማሌና የአማራ ህዝቦች አብሮነት ታሪካዊ ልምድ’’ በሚል ርዕስ ባቀረቡት ጽሑፋቸው እንዳብራሩት ሁለቱ ህዝቦች በጋራ አኩሪ ገድሎችን ፈጽመዋል፡፡ ሁለቱ ህዝቦች የመካከለኛ ዘመን ስልጣኔ መስራች ህዝቦች ናቸው፡፡

በመካከለኛ ዘመን የኢትዮጵያ ታሪክ አሻራ አኑረዋል፡፡ ለዚህም ከጂግጅጋ 400 ኪሎ ሜትር ርቀት ላይ የሚገኘውንና ብዙ ያልተነገረለትን “ደርጊ በላምል” የተሰኘውን መስጊድ፣ ቤተመንግሥትና ትክል ድንጋዮችን አጠቃሎ የያዘውን ቅርስ እንደማሳያ አንስተዋል፡፡ በተመሳሳይ በአማራ ክልልም ላሊበላና ፋሲል የመሳሰሉ የመካከለኛ ዘመን ቅርሶችንም ለማሳያነት ጠቅሰዋል፡፡

በመካከለኛ ዘመን እነዚህን ተዓምሮችን የሠሩ ህዝቦች በዚህ  ዘመንም በጋራ መሥራት ከቻሉ ተዓምር መሥራት ይችላሉ፡፡ የህዝብ ለህዝብ ግንኙነቱ የቀደመ ስልጣኔያቸውን ለማስቀጠል ይረዳል ብለዋል፡፡

ዶክተር ዋጋው አክለውም፤ ሁለቱ ህዝቦች ለሀገር ሉዓላዊነትና አንድነት መስዋዕትነት የከፈሉ መሆናቸውን አንስተዋል፡፡ የአድዋ ጦርነትና ሌሎች ታላላቅ ጦርነቶች ላይ ከመላው የኢትዮጵያ ብሄር ብሄረሰቦች ጋር በመሆን ሁለቱ ህዝቦች የከፈሉትን መስዋዕትነት አንስተዋል፡፡

እንደ ዶክተር ዋጋው ማብራሪያ፤ ሁለቱ ህዝቦች በጸረ ቅኝ ግዛት እንቅስቃሴ ላይ ከፍተኛ ታሪክ የሠሩ ናቸው፡፡ የኢትዮጵያ ሶማሌ ተወላጅ በሆኑት በሰዒድ ሞሃመድ የተደራጀው የደርቡሽ እንቅስቃሴ ረጅሙና እልህ አስጨራሽ የጸረ ቅኝ ግዛት ትግል በአፍሪካ ተጠቃሽ ነው፡፡

ሌላኛው ጽሑፍ አቅራቢ ዶክተር ንማን አብዱላሂ በበኩላቸው፤ ሁለቱ ህዝቦች በሀገር ምስረታ ላይም የላቀ ሚና ተጫውተዋል ብለዋል፡፡ ኢትዮጵያ ዛሬ የያዘቺውን ቅርጽ ከማስያዝ አኳያ ከፍተኛ ሚና ተጫውተዋል፡፡ ግንኙነታቸው ተፈጥሯዊና አንዱ በሌላው ላይ የተደገፈ ከመሆኑም ባሻገር ሁለቱ የተጋቡና የተዋለዱ ናቸው ሲሉ አብራርተዋል፡፡

ግንኙነታቸው የበለጠ ቢጠናከር ለሀገር አለኝታ ይሆናል ያሉት ዶክተር ንመን የሁለቱ ሕዝቦች ግንኙነት እንዳይጠናከር የሚያደርጉ የፖለቲካ እንቅፋቶች መኖራቸውን አንስተዋል፡፡

የራሳቸውን የፖለቲካ ትርፍ ለማጋበስ የሚፈልጉ ኃይሎች የፈጠሩት የተዛበ ትርክት የህዝቡ ግንኙነት እንዳይጠናከር አድርጓል፡፡ በመሆኑም የሁለቱን ህዝቦች ግንኙነት ለማስተካከል የተዛቡ ትርክቶችን ማስተካከል ያስፈልጋል ብለዋል፡፡

እንደ ዶክተር ንመን ማብራሪያ፤ የሁለቱን ህዝቦች ግንኙነት የበለጠ ለማጠናከር የሱማሌ ባለሀብቶች በአማራ ክልል በተለያዩ ዘርፎች መዋዕለ ንዋይ የሚያፈሱበት ሁኔታ ሊመቻች ይገባል፡፡ የአማራ ህዝብ በሱማሌ ክልል ከተሞች መዋዕለ ንዋዩን ማፍሰሱን መቀጠል አለበት፡፡ ከዚያ ጎን ለጎን እኩይ አስተሳሰቦችን የሚያራምዱ ልህቃንም ከእኩይ ተግባራቸው እንዲቆጠቡ ሊደረግ ይገባል ብለዋል፡፡  

አዲስ ዘመን ሐምሌ 15/2011

መላኩ ኤሮሴ

የኢህአዴግ ውስጣዊ ችግር ካልተፈታ አገሪቱን አደጋ ላይ ይጥላታል

በአማራ ዴሞክራሲያዊ ፓርቲ(አዴፓ) እና በህዝባዊ ወያነ ሓርነት ትግራይ(ሕወሓት) መካከል የነበረው የቃላት ጦርነት እንዲሁም የደቡብ ኢትዮጵያ ህዝቦች ዴሞክራያዊ ንቅናቄ(ደኢህዴን) የክልል እንሁን ጥያቄን በአግባቡ መምራት ላይ ያለው ክፍተት ካልተፈታ አገሪቱን ለከፋ አደጋ እንደሚያጋልጣት የፖለቲካ ምሁራን ይናገራሉ።

የፖለቲካ ምሁር የሆኑት አቶ ልደቱ አያሌው ከአዲስ ዘመን ጋዜጣ ጋር በነበራቸው ቆይታ እንደሚናገሩት፤አዴፓና ህወሓት ከተቋቋሙ ረጅም ዓመት ሆኗቸዋል።አብረውም መሥራት ከጀመሩ እንደዚያው።ሄደው ሄደው ግን ወደበለጠ አንድነትና መዋሃድ ሳይሆን ወደ መለያየትና መፈረካከስ የሚወስድ መንገድ እየተከተሉ ነው።ይህ ችግር ካልተፈታ ደግሞ በቀጣይ አገሪቱን ወዳልተፈለገ አዘቅት ውስጥ ሊከታት ይችላል።

እንደ አቶ ልደቱ ገለጻ፤ ከዛሬ ሁለት ዓመት በፊት በነበረውና ለዚህ ለውጥ ምክንያት በሆነው የህዝብ ትግል ምን ዓይነት ጥያቄዎች ተነሱ? ህዝቡስ ምን ይደረግልኝ፣ ምን ይለወጥልኝ አለ? የሚለውን በደንብ አድርጎ ለመመለስ መሞከር መፍትሔ ያመጣል። ለውጡም ይህንን የረሳው ይመስላል። አንደኛ ‹‹እኔ ብቻ ነኝ›› መፍትሔ የማመጣው ብሎ ሁሉንም ነገር መቆጣጠሩ ስህተት ነው። ሁሉን አቀፍ የሆነና አገርን ወደ ተሻለ ደረጃ የሚያሸጋግር ኃይል ማሰባሰብና አብሮ መሥራት አለበት።

በህገ መንግሥቱ መሰረት የክልልነት ጥያቄ ያቀረቡት እነዚህ አካላት መብት አላቸው የሚሉት አቶ ልደቱ፤ ነገር ግን ይህ የክልል እንሁን ጥያቄ የት ቦታ ነው መቆሚያው የሚለው መታየት እንደሚገባው ይናገራሉ። ስለዚህ ይህ ጉዳይ እየተበረታታ ሁሉም ብሔር ብሔረሰብ የክልልነት ጥያቄ የሚያቀርብ ከሆነ እንደ አገር ሰባ እና ከዚያ በላይ ክልሎች ሊኖሩን እንደሚችሉ ይጠቅሳሉ።

በሌላ በኩል ደግሞ የክልል መሆንን መብት ካገኙም በኋላ ጥያቄያቸው ይቆማል ማለት አይደለም የመገንጠል መብት ሊጠይቁ እንደሚችሉ ያመለክታሉ። ህገ መንግሥት የሚረቀቀውና የሚጸድቀው አገርን ለማፍረስ ሳይሆን የአገርን አንድነት ለማጽናትና ለማረጋጋት እንዲሁም ህዝብን አንድ አድርጎ ለመቀጠል ነው። የአገሪቱ ህገ መንግሥት የረቀቀውና የጸደቀው ግን ከዚህ በተቃራኒ መሆኑን እየመጡ ያሉ ጥያቄዎች ማሳያ መሆናቸውን ያስረዳሉ።

በወልቂጤ ዩኒቨርስቲ የፖለቲካል ሳይንስና ዓለም አቀፍ ግንኙነት መምህር የሆኑት አቶ ዳንኤል መኮንን እንደሚናገሩት፤ በኢህአዴግ ውስጥ የሚገኙት ሦስት ድርጅቶች ውስጥ የተከሰተውን ሁኔታ በአፋጣኝ መፍታት ካልተቻለ አገሪቱን ስጋት ውስጥ ይከታታል። በአዴፓና በሕወሓት መካከል ያለው ሲታይ ሕወሓት ከዓመት በፊት የራሱን መንገድ ይዞ እየሄደ ያለ ፓርቲ ነበር።

አዴፓ ደግሞ የነበሩበትን ችግሮች ለመፍታት እየሠራ ይገኛል። በዚህ መካከል ግን ነገሮች ተካረዋል። ከለውጡ መምጣት በኋላ በሁለቱ ፓርቲዎች መካከል ክፍተቶች ይታያሉ። እንደበፊታቸው አብረው መሥራት አቅቷቸዋል። ይህ ደግሞ ወደ ቃላት ጦርነት ወስዷቸዋል።

“ደኢህዴን በበኩሉ የራሱ ውስጣዊ ችግሮች አሉበት፤ በዚህም ክልሉን ማስተዳደር እያቃተው ይገኛል” ያሉት አቶ ዳንኤል፤ በደቡብ ውስጥ ክልል እንሁን የሚሉ ጥያቄዎች በመብዛታቸው ክልሉ መረጋጋት እንዳቃተው ይገልጻሉ። የአዴፓና የሕወሓት ሁኔታ የስልጣን ሽኩቻ ወይም ፉክክር ሲሆን ቀድሞ የነበረ አለቃና ምንዝር የነበሩ ድርጅቶች ዛሬ እኔ ነኝ መሪ የሚል ፍትጊያ ውስጥ መግባታቸው አደገኛ ነገር ሊፈጥር እንደሚችል ይጠቅሳሉ።

እንደ አቶ ዳንኤል ማብራሪያ፤ የደኢህዴን ጉዳይ ውስጣዊ ችግር ሲሆን በተለይ አስተዳደሩ በህዝቡ ዘንድ ቅቡል ያለመሆን ነገር ይታያል። አዴፓና ሕወሓት ግን በህዝቦቻቸው ዘንድ የተሻለ ተቀባይነት አላቸው። በደቡብ አንዳንድ ወረዳዎች ለዞን ታዛዥ ያለመሆን ነገር አለ።ይህ እንደ ፓርቲ ሲወሰድ በጣም አስቸጋሪ ነው።በዚህም ኢህአዴግ በአግባቡ እየመራ አይደለም ተብሎ ሊወሰድ ይችላል።

በቀጣይ ይህ ሁኔታ ከቀጠለ አስፈሪ ነው። ምክንያቱም ኢህአዴግ የአራት ፓርቲዎች ጥምረት ሆኖ አገር እያስተዳደረ እንደመሆኑ መጠን በጥምረቶቹ መካከል ክፍተት ከተፈጠረ ወደመጡበት ክልል የመመለስ ሁኔታዎች ስለሚኖሩ የደህንነት ስጋት ይፈጥራል።ስለዚህ ሦስቱ ፓርቲዎች መካከል ያለው ችግር የኢህአዴግን ብቻ ሳይሆን የአገር ጉዳይ ጭምር ነው።ስለዚህ የተፈጠረውን ችግር ለመፍታት ኢህአዴግ ተቀምጦ መወያየት መቻል አለበት።

ህዝባዊ ወያነ ሀርነት ትግራይ(ሕወሓት) ድርጅታዊ ስብሰባው ካደረገ በኋላ የአማራ ዴሞክራሲያዊ ፓርቲ (አዴፓ) መግለጫ መስጠቱ ይታወሳል። ህወሓት በመግለጫው አዴፓ በክልሉ ውስጥ ለተፈጠረው ችግር ኃላፊነት ወስዶ ይቅርታ መጠየቅ አለበት ሲል አዴፓ በበኩሉ ህወሓት በአገሪቱ ለተፈጠሩት ችግሮች ዋነኛ ተጠያቂ መሆን አለበት በማለቱ ከፍተኛ ውጥረት ነግሦ እንደነበር ይታወቃል።

በዚህም ሁለቱ ፓርቲዎች አብረው መቀጠል እንደማይፈልጉም በመግለጫቸው አሳውቀዋል።የደቡብ ኢትዮጵያ ህዝቦች ዴሞክራያዊ ንቅናቄ(ደኢህዴን) በሚመራው ክልል ውስጥ የሚገኙ አስር የሚሆኑ ዞኖችም ክልል መሆን አለብን የሚለውን ጥያቄ እያነሱ በክልሉ ላይ የሰላም ስጋት ፈጥሯል።

እንደ አቶ ዳንኤል ገለጻ፤ የኢህአዴግ ውስጥ ያሉት አራቱ ፓርቲዎች አብረን አንቆይም ብለው ከተበተኑ የመንግሥት መውደቅ ይከሰታል።ከአራቱ ውስጥ ሦስቱ አንፈልግም ብለው ቢወጡ ከፍተኛ ድምፅ ያለው መንግሥት ለመመስረት ግዴታ 51 በመቶ ድምፅ ያስፈልገዋል።

በአሁን ወቅት ከአራቱም የትኛውም ፓርቲ ይህንን አያሟሉም።መንግሥት ከመመስረት ፍልስፍና ተወጥቶ ሁኔታው ቢታይ የተሻለ ይሆናል።ፓርቲዎቹ የሚወክሉት የራሳቸውን ብሄር ነው።አንዱ ፓርቲ ከሌሎች ጋር ሆኖ መንግሥት ቢመሰርት እንኳ አገሪቱ ወዳልሆነ መንገድ ታመራለች።በአገሪቱ ያሉት የፌዴራልና የክልል መንግሥታት ሲሆኑ ፌዴራል መንግሥቱ በጥምር ቢያዝ ክልሎች ወደ ኮንፌዴሬሽን ሊገቡ ይችላሉ።ስለዚህ ከአራቱ አንዱ ቢወጣ ክልሉ ሄዶ መንግሥት ስለሚመሰርት ከፍተኛ ስጋት ሊፈጥር ይችላል።

አዲስ ዘመን ሐምሌ 15/2011

መርድ ክፍሉ

የአቶ ደመቀ መኮንን ሙሉ መልዕክት

ምክትል ጠቅላይ ሚኒስትርና የአዴፓ ሊቀ መንበር አቶ ደመቀ መኮንንን በአማራ ክልል ርዕሰ መስተዳድር አቶ ተመስገን ጥሩነህ በዓለ ሲመት ላይ ያደረጉትን ንግግር በድምጽ መስማት ያልቻላችሁ ተከታታዮቻችን በጠየቃችሁት መሠረት ሙሉ መልዕክታቸውን በጽሑፍ አቅርበናል፡፡

ምክትል ጠቅላይ ሚኒስትር አቶ ደመቀ መኮንን በአማራ ክልል ርዕሰ መስተዳደር በዓለ ሲመት ላይ ያስተላለፉት ሙሉ መልዕክት፡፡ 
ባሕር ዳር ሐምሌ 15 ቀን 2011 ዓ.ም 
ክቡራት እና ክቡራን
ሁላችንም እንደምናስታውሰው . . . ከዛሬ አምስት ወራት በፊት በዚህች ውብ ከተማ በዚሁ ቦታ የወንድማችንን የዶክተር አምባቸው በዓለ ሲመት ሥነ-ስርዓት ላይ አብረን ታድመናል፤ ከጥቂት ሳምንታት በፊት ደግሞ ማንኛችንም ባልጠበቅንበት ሁኔታ የጓደኞቻችንን ሕይወት ስንነጠቅ በመሪር ሐዘን ውስጥ ወድቀን እንባ ተራጭተናል፡፡
ነገር ግን . . . እንባ ተራጭተን፣ ሐዘን በብርቱ ክንዱ ደቁሶን፣ አንገታችንን ደፍተን አልቀረንም፡፡ አባቶቻችን ያወረሱንን ብልሀት ተጠቅመን፣ የሕዝባችንን ብርቱ የድጋፍ ድምፅ አክብረን፣ የአማራ እናት ማኅፀን የመሪ መካን አለመሆኗን ለማብሰር ዳግም ተገናኝተናል፡፡
ከሳምንታት በፊት ቅስም ሰባሪ ሐዘን ቢገጥመንም ከጥቁሩ ደመና በስተጀርባ አንዳች ተስፋ ይታየን ነበር፤ ዛሬም የአማራ ሕዝብ ከሌሎቹ ወንድም ሕዝቦች ጋር ሆኖ ለታላቅ የእናት ሀገር ግንባታ ይዋደቃል፡፡ የጀመርነው ትግል . . . እንዲሁ በቀላሉ በጓደኞቻችን ሞት የሚደናቀፍ ጉዞ እንዳልሆነ ሁሉም ያውቃል፡፡
የሕዝባቸውን ሕይወት ለማሻሻል ሌት ተቀን ሲውተረተሩ በአጭሩ የተቀጩ ጀግኖቻችን ሁሌም በልባችን የተስፋ ፈርጦች እና አብነቶች ሆነው ይቀጥላሉ፡፡ ነገር ግን ከእነርሱ ሕልፈት በኋላ ሕይወት ይቀጥላል እና … እነሆ በአዲስ የቁጭት መንፈስን ተነሳስተናል፡፡

አንዳንድ ፀሐፍት እንደሚሉት ኅብረተሰብ የሚያገኘው የሚገባውን መሪ ነው፡፡ መሪዎች የቱንም ያህል ታላቅ ሐሳብ ቢፀንሱ ካልታገዙና ካልተበረታቱ እጀ ሰባራ ይሆናሉ፡፡ መሪዎች ሲያጠፉም ጭምር የመሳሳት ዕድል በመስጠት በጊዜ ሂደት እየካበተ የሚመጣ የመሪነት አቅም እንዲገነቡ ልንፈቅድ ይገባል፡፡ 
መሪነት የልምምድ፣ የትጋት እና የመማር ውጤት እንደሆነው ሁሉ፤ መሪዎቹን የተረዳና ያላንዳች ስስት ትልልቅ ሐሳቦች ወደ ተጨባጭ ኅልው ሐሳቦች እንዲቀየሩ የኔ የሚሉት ኅብረተሰብ በእጅጉ ያስፈልጋቸዋል፡፡
በዚህ ዘመን ‹‹ለመሪነት የተፈጠረ ሰው›› ብሎ ነገር የለምና በአሁን ጊዜ በመሪነት እየተሳተፍን ያለን አመራሮች … ገና ከሕጻንነት ጀምሮ ለመሪነት ተዘጋጅተን የመጣን አልጋ ወራሾች አይደለንም፡፡ 
ስለሆነም መሪዎች የሚነሱትም ሆነ የሚወድቁት በኅብረተሰብ እንቅስቀሴና ጥያቄ ዙሪያ በሚፈጠሩት እርካታዎች ባሉ አሉታዊ እና አዎንታዊ ሚና በመሆኑ ለመሪዎቻችን ስኬታማነት ኅብረተሰቡ ከጎናቸው በመሆን አስፈላጊውን ሁሉ ሊያደርግላቸው ይገባል፡፡

ክቡራት እና ክቡራን
በረጅሙ ታሪካችን ውስጥ በእርካታ የሐዘን እና የፍስሐ ዘመናትን ዓይተናል፡፡ ተርበናል፤ ታርዘናል፤ በርካታ የደስታ ዘመናትን አሳልፈናል፤ በነፃነት ጮራ በዓለም አደባባይ ላይም ለአፍሪካ ቆመናል፡፡ በአጭሩ አግኝተን አጥተናል፤ ነገር ግን በዚህ ረጅም የታሪክ ምዕራፍ ውስጥ ሁሌም የኛ ሆነው የቀጠሉ ቀንዲሎች አሉ፤ ከነዚህም ዋነኞቹ ሀቀኝነት እና የሞራል ልዕልና ናቸው፡፡
አንደ ኅብረተሰብ ተሳስሮ የሚገመደው በሞራል እሳቤዎቹና እሴቶቹ ነው፡፡ ትክክል እና ስህተት ወይም እውነት እና ሀሰት ብለን በነገሮች ላይ ግለሰባዊ እና ማኅበረሰባዊ ብያኔዎችን የምናሳልፈው በእነዚህ አስተሳሰቦች ላይ ተመርኩዘን ነው፡፡

የሞራል እሳቤዎቻችን እና እሴቶቻችን የማኅበራዊዊ ጉዞ መነሻ እና መድረሻ የሚያሳዩ ካርታዎች ናቸው፡፡ አንድ ኅብረተሰብ እነዚህን ያጣ ዕለት መነሻ እና መድረሻውን ሳያውቅ ወደ ሩቅ ሀገር ለማቅናት የተነሳ፣ ቅጣንባሩ የጠፋበት ማኅበረሰብ ነው የሚሆነው፡፡
የአማራ ሕዝብ ለዘመናት ከትውልድ ወደ ትውልድ ሲተላለፍ የመጣ የሞራል እሳቤዎች እና እሴቶችን የተላበሰ ማኅበረሰብ ነው፡፡ በመሆኑም ያጋጠመንን ከባድ ችግርና ኪሳራን በእጅጉ በሚቀንስ እና ማኅበረሰቡን ከሚከፋፍሉ ነገሮች ራሱን ጠብቆ በጋራ ለመቆም አስችሎታል፡፡ 
ነገር ግን እነዚህ የኅልውና እና የማንነታችን መሠረት የሆኑ አንጡራ ሀብቶቻችን ነቅተን ካልጠበቅናቸው በዋዛ ፈዛዛ ከእጃችን ሊወጡ ይችላሉ፡፡ በዚህ ወቅት በጥቂቱም ቢሆን ከሩቁ እየታዩ ያሉት ምልክቶች የሞራል እሳቤዎቻችን እና እሴቶቻችን መሸርሸር ጠቋሚ ምልክቶች ናቸው፡፡ ይህንን አዝማሚያ ገና ከማለዳው ልናርመው ይገባል፡፡ 
በመሆኑም እዚህ ያደረሱንና የምንታወቅበትን የሞራል ከፍታ ስለእውነት መቆምንና ሚዛናዊነትን በእጅጉ መጠበቅና ማጥበቅ ይኖርብናል፡፡ ይህንን የሚፈታተኑ አሰላፎችንና ውሎዎችን መግራትና ማከም ይጠይቃል፡፡ ከዚህ ውጭ ያለው መንገድ ሁሉ ቁልቁለት ነው፡፡

ክቡራት እና ክቡራን የዚህ ታሪካዊ ፕሮግራም ታዳሚዎች
እንደ ሀገር ምንም እንኳን የዚህ ቀጠና ዝሆን ብንሆንም አንድም ሀገር ወርረን አናውቅም፤ በወራሪዎችም ተደፍረን አናውቅም፡፡ ይሄ እውነታ በረጅም ታሪካችን ውስጥ ለሞራል ልዕልና ያለንን ቦታ በደማቁ ይናገራል፡፡ 
ይህን በውድ ዋጋ የጠበቅነውንና ከነጣቂዎችም ጭምር እየተከላከልን የኛ አድርገን ያቆየነው እሴት ውስጣዊ አንድነታችንን በማጠናከር ለትውልድ ልናሻግረው ይገባል፡፡
ጥላቻን፣ መገዳደልን፣ አሉባልታን ቅቡል የሚያደርግ አስተሳሰብ በእንጭጩ ካልተቀጨ፤ ዛሬ ማኅበረሳበዊ ባሕል እየሆነ የእያንዳንዳችንን ጓዳ እያንኳኳ ስለሆነ ጊዜ ሳይሰጠው ልናስቆመው፣ በእውነት አደባባይ ላይ ቆመን ልንፋረደው ይገባል፡፡ 
በዚህም እውነትና ፍትሕ ነግሠው፤ ዳር እስከ ዳር ለዜጎች የተመቸች፤ እኩልነት የሰፈነባት እና ዴሞክራሲ ያበበባት ሀገር የመገንባት ራዕይ ሰንቆ መጓዝ ይጠይቀናል፡፡ ወቅቱ ከዘረኝነት አጀንዳ ወጥተን የታላቅነት ትርክትና ራዕይ የምናውጀበት ወቅት ነው፡፡

በአመራር ታሪክ የቅብብሎሽ ሰንሰለት ውስጥ … በአስጨናቂ እና በአስቸጋሪ ጊዜ ሀገራቸውን ከማጥ መንጥቀው በመታደግ ወደ ብልፅግና ጎዳና የሚወስዱ የጨለማ ጊዜ ብርሃኖች፤ የለውጥ አቀጣጣይ ኮኮቦች በእጅጉ አስፈላጊ ናቸው፡፡ 
በኛ ምድር የተፈጠሩት ታላላቆቹ የሀገራችን መሪዎች ባልተመቸ ሁኔታ ውስጥ አልፈው ታላቅ ሀገር አስረክበውናል፡፡ ዛሬ በእርግጥም ከትናንት የተሻለ ቢሆንም መልካም አጋጣሚዎችና ተግዳሮቶች እየተጠላለፉ አገራችንን እና ክልላችንን እየተፈታተኑ ስለሆነ ትናንት ያጣናቸውን መሪዎች የሚተኩ አመራሮች መተካት የማይቀር የቤት ሥራችን ሆኗል፡፡
እነሆ ዛሬም ሕዝባችን የአመራር መካን ባለመሆኑ … የአመራሮቻችንን ኅልፈት ተከትሎ የተፈጠረብንን ክፍተት ለሟሟላት ተኪ አመራሮችን የማሟላት ሥራ አከናውነናል፡፡ 
በዚህ ወሳኝ የጉዞ ምዕራፍ ላይ የተተኩት አመራሮች እነ አቶ ተመስገን ጥሩነህ፣ አቶ ዮሐንስ ቧያለው እና ጓደኞቻቸው ይህንን ታሪካዊ ኃላፊነት ከሕዝቡ ጋር እጅ ለእጅ ተያይዘው በስኬት እንደሚዘልቁ ሙሉ እምነት ያለኝ መሆኑንም ላረጋግጥላችሁ እወዳለሁ፡፡ 
የብርቱ አማራ አርሶ አደር ልጆች የሆኑት እነአቶ ተመስገን ጥሩነህ እና ጓደኞቻቸው ባለፉት ዓመታት በተሰማሩበት በተግባር የተፈተኑ፣ በቀጣይ የክልላችንን ሕዝብ ስጋት፣ ፍላጎት እንዲሁም ቋሚ ጥቅም ለማስከበር ታጥቀው የተነሱ ናቸው፡፡
በዚህ ወቅት አመራሮቹ የተጣለባቸውን ታሪካዊ ኃላፊነት በውጤታማነት እንዲወጡ እና ከፊት ለፊት ለሚጠብቃቸው ብርቱ የለውጥ ጉዞ ስኬታማ እንዲሆኑ ለክልላችንና ለታላቋ ኢትዮጵያ የብልፅግና ጉዞ የቆማችሁ ሁሉ ከጎናቸው እንድትሰለፉ ጥሪዬን ለማስላለፍ፡፡
ክቡራት እና ክቡራን!
በመጨረሻም በወንድሞቻችን ላይ በደረሰው ያልታሰበ ጥፋት ተከትሎ ክልላችን ከተጋረጠበት የሠላም እና የፀጥታ ስጋት በፍጥነት አገግሞ መደበኛ ሕይወት በተስፋ እንዲያንሰራራ ለተረባረባችሁ የክልላችን ሕዝቦች፤ የፌዴራል እና ክልል ፀጥታ አካላት እና የክልል መንግሥታት አመራሮችና ሕዝቦች ከልብ እያመሠገንኩ፤ ለአዲስ አመራሮች ውጤታማ
የሥራ ዘመን እንዲሆንላችሁ እመኛለሁ፡፡

አመሠግናለሁ!

የትህነግ “የሴራ ፖለቲካ እርቃን ፣ ” ጅራፍ ራሱ ገርፎ ራሱ ይጮሃል”” – ከአዴፓ ሥራ አስፈፃሚ ኮሚቴ የተሰጠ መግለጫ –

የድርጅታችን አዴፓ ሥራ አስፈፃሚ ኮሚቴ ሰኔ 15/ቀን 2011 ዓ.ም በክልላችን መንግስት ላይ ተሞክሮ ሙሉ በሙሉ በከሸፈው መፈንቅለ-መንግስት እና በከፍተኛ አመራሮቻችን ላይ በተፈፀመው የግፍ ግድያ ምክንያት የማዕከላዊ ኮሚቴያችን ሰኔ 21 ቀን 2011 ዓ.ም ባደረገው አስቸኳይ ስብሰባ ባስቀመጣቸው አቅጣጫዎች ላይ ተመስርቶ በወቅታዊ ጉዳይ እና ቀጣይ የትግል አቅጣጫዎች ግምገማ ለማድረግ ሐምሌ 4 ቀን 2011 ዓ.ም እየመከረ ባለበት፣ የአማራ ህዝብና የኢትዮጵያ ብሄር፣ ብሔረሰቦችና ህዝቦች ከጥልቅ ሃዘናችን ባልተላቀቅንበት በዚህ ነባራዊና ህሊናዊ ሁኔታ ውስጥ ሆነን “በሰው ቁስል እንጨት ቢሰዱበት” እንዲሉ፣ የትህነግ/ህወሓት ማዕከላዊ ኮሚቴ ሐምሌ 3 ቀን 2011 ዓ.ም ባወጣው መግለጫ የትህነግ/ህወሓትን የነበረና እየቀጠለ ያለ አሳፋሪ የሴራ ፖለቲካ እርቃኑን በአደባባይ ያጋለጠ የአቋም መግለጫ ማውጣቱ “ጅራፍ እራሱ ገርፎ እራሱ ይጮሃል እንዲሉ” አገራችን አሁን ለምትገኝበት የፖለቲካ ብልሽት እራሱ ዋና ተጠያቂ ሆኖ ሳለ፣ የአማራን ህዝብ ህልውናና ክብር የማይመጥን መግለጫ አውጥቷል፡፡ 
ምንም እንኳን የድርጅታችን ሥራ አስፈፃሚ ኮሚቴ ለስብሰባ የተቀመጠው ካጋጠመን ወቅታዊ ችግር በፍጥነት እንዴት መውጣት እንዳለብን እና የለውጡን ቀጣይነት ጠብቀን መዝለቅ እንደሚገባን ለመምከር ቢሆንም፣ የትህነግ/ሕወሓት መግለጫ ከሐዘን ባልወጣንበት ሁኔታ ከአንድ እህት ፓርቲ የማይጠበቅ አሳፋሪ ድርጊት በመሆኑ፣ ድርጊቱን ለማውገዝና ለአብሮነትና ለትግራይ ህዝብ ባለን ክብር እያየን እንዳለየን የታገስነውና እና ያለፍነውን ነገር ሁሉ፣ ትህነግ/ሕወሓት በመግለጫው “እራሱ ነካሽ፣ እራሱ ከሳሽ” ሆኖ በመቅረቡ ይህ የአዴፓ የሥራ አስፈፃሚ ኮሚቴ መግለጫ አስፈላጊና ወቅታዊ ሆኖ አገኝተነዋል፡፡ 
የትህነግ/ሕወሓትን መሠሪ እና አሻጥር የተሞላበት የዘመናት ባህሪውን በማጋለጥ፣ የአማራ ህዝብን ጨምሮ የኢትዮጵያ ብሔር፣ ብሔረሰቦችና ህዝቦች ባደረጉት ቆራጥ ትግል የተገኘውን ህዝባዊ ድል ደግሞ ደጋግሞ በማንኳሰስ እና ፈፅሞ አክብሮት የማያውቀውንና እራሱ ሲጥሰው የነበረውን ህገ-መንግስታዊና የፌዴራል ስርዓት ጠበቃ በመምሰል፣ የኢትዮጵያ ብሔር፣ ብሔረሰቦችና ጭቁን ህዝቦችን በማደናገር ለዳግም ሰቆቃ እንዲዳረጉ እያደረገ ባለበት፣ በፀረ-ለውጥ እንቅስቃሴው አገራዊና ክልላዊ ለውጡ በጥርጣሬ እንዲታይ ከጥፋት ሃይሎች ጀርባ መሽጐ አመራር እየሰጠ ባለበት ሁኔታ፣ ለኢትዮጵያ ህዝቦች የለውጥ ፍላጐት መነሻ ተደርገው የተወሰዱ አሳሪና ደብዳቢ ፀረ-ዴሞክራቶችን፣ ህዝብና አገር በድፍረት የዘረፉ ሌቦችን፣ በብሄር፣ ብሄረሰቦች ህዝቦች ልጆቹ ላይ ኢ-ሰብአዊ ድርጊት የፈፀሙ ተጠርጣሪ ወንጀለኞችን አቅፎና ደብቆ በያዘበት ሁኔታ የትህነግ/ሕወሓት ማዕከላዊ ኮሚቴ ያወጣው መግለጫ የዘመናት አስመሳይነቱን ያጋለጠ፣ እራሱን ብቸኛ የኢትዮጵያ ጠበቃ አስመስሎ መቅረቡ የሞራል እና የተግባር ብቃት የሌለው ድርጅት መሆኑ የሚታወቅ ነው፡፡

ትህነግ/ሕወሓት ከምስረታው ጀምሮ በ1968 ማኒፌስቶው የአማራን ህዝብ በጠላትነት የፈረጀ፣ ከሌሎች ወንድምና እህት ህዝቦች ጋር ተከባብሮና ተሰናስሎ በፍቅር እንዳይኖር “ትምክህተኛና ሌሎች አግላይ ስያሜዎችን እየሰጠ ለዘመናት የፈፀመው ግፍና በደል ሳያንሰው ዛሬም ከለውጥ ማግስት በአደባባይ ተሸንፎ ህዝባዊ እርቃኑ በተጋለጠበት በዚህ ሰዓት፣ አጠቃላይ ትግሉ የኢትዮጵያ ህዝቦች የትህነግ/ህወሓትንና የጥፋት ኃይሎችን እኩይ ድርጊት መፋለም ሆኖ ሳለ ትግሉ በትህነግ/ህወሓትና በአዴፓ መካከል የሚካሄድ በማስመሰል፣ ወቅታዊ ጉዳታችንን እንደ ዘላቂ ሽንፈትና ውድቀት በመቁጠር፣ ዛሬም የአማራን ህዝብ አንገት ለማስደፋት “የተቀበረውን የትምክህት ትርክቱን ዳግም ይዞ ብቅ ማለቱ ድርጅቱ መቼም ቢሆን መፈወስ የማይችል በሽታ ያለበት መሆኑን ያጋለጠ ተግባር ነው፡፡ በእርግጥም ትህነግ/ሕወሓት በዚህ ባህሪው ይታወቃል፡፡ በፅናት የሚታገሉትንና ከኔ ጎን አይሰለፉም የሚላቸውን ኃይሎች ሲሻው ትምክህተኛ፣ ሲሻው ጠባብና አሸባሪ በማለት ታርጋ እየለጠፈ የሚያሸማቅቅ ፀረ-ዴሞክራሲያዊ ድርጅት መሆኑ መላ የኢትዮጵያ ህዝብ ያውቀዋል፡፡ በመሆኑም የትህነግ/ሕወሓት መግለጫ አዲስ ነገር ይዞ የመጣ ሣይሆን የተለመደ ፖለቲካዊ ሴራ ማሳያ ነው፡፡ 
ትህነግ/ህወሓት ከተፈጠረበት ጊዜ ጀምሮ የሁለት አገረ-መንግስት እይታ ያለው፣ አንድም ቀን ለህዝቦች አንድነት የማይጨነቅ፣ በስልጣን ላይ እስከቆየና ዕላፊ ጥቅም እስካገኘ ድረስ ብቻ አስመሳይ የአንድነት ኃይል ሆኖ መቀጠል የሚፈልግ፣ ነገር ግን እንደዛሬው በስልጣን ላይ ሆኖ በአድራጊ ፈጣሪነት ሁሉንም ማሳካት ሳይችል ሲቀር፣ በቁም ቅዥትና ከትግራይ ህዝብ ስነ-ልቦና ባፋነገጠ መልኩ “የዥዋዥዌ ፖለቲካን” የሙጥኝ ያለ እምነት የማይጣልበት ድርጅት ነው፡፡

የአማራ ህዝብና መሪ ድርጅታችን አዴፓ ለእውነተኛ ዴሞክራሲ፣ ለሐቀኛ የፌዴራሊዝም ስርዓት፣ ለእውነተኛ ህገ-መንግስታዊ ስርዓትና ለእውነተኛ የኢትዮጵያ ብሔር ብሔረሰቦች እኩልነት፣ ፍትሃዊ ተጠቃሚነት፣ ለጠንካራ ኢትዮጵያዊ አንድነት ፅኑ እምነት ይዞ የሚታገል ህዝብና ድርጅት እንጂ ትህነግ/ሕወሓት ደጋግሞ እንደሚከሰው ሳይሆን ለአገር አንድነት የሚተጋ፣፣ በሌሎች ጉዳት ላይ የተመሠረተ ተናጠላዊ ጥቅምን ማረጋገጥ የማይፈልግ፣ ሐቀኛና ህዝባዊ ድርጅት ነው፡፡

አሁን በምንገኝበት የለውጥ መድረክም የአማራ ህዝብና ድርጅታችን አዴፓ ሆን ተብሎ የተበላሸውን አገራዊ ፖለቲካዊ ሁኔታችን እንዲታረም፣ ከሌሎች የለውጥ ሃይሎች ጋር ሆኖ ፊት ለፊት የተፋለመና የለውጡን ውጤቶች ጠብቆ ለመዝለቅ ሌት ከቀን የሚታትር ድርጅት እንጂ እንደ ትህነግ/ሕወሓት በከፋፋይት በሽታ የተጠመደ ድርጅት አይደለም፡፡ 
ሰኔ 15/2011 ዓ.ም በክልላችን ከፍተኛ አመራሮች እና የኢትዮጵያን አንድነት መስዋዕትነት እየከፈለ ለማስቀጠል በሚተጋው የመከላከያ ሀይላችን የጦር ጄኔራሎች ላይ ያነጣጠረው ግድያ እና የመፈንቅለ መንግስት ሙከራ በድርጅታችን አዴፓ፣ በአማራ ህዝብና በኢትዮጵያ ህዝቦች ላይ የተፈጸመ ጥቃትና የለውጣችን ከፍተኛ ተግዳሮት መሆኑን እንገነዘባለን፡፡ በመሆኑም የጥፋት ድርጊቱን ከህዝባችንና ከፀጥታ መዋቅራችን ጐን ተሰልፈን በፅናት የተፋለምነውና ከፍተኛ መስዋዕትነት የከፈለንበት ነው ብለን እናምናለን፡፡ በሂደቱም ለኢትዮጵያ አንድነት ያለንን ቁርጠኝነት ዳግም ያሣየንበትን ታሪካዊ ወቅትና የትግላችን አንድ አካል የሆነውን ጥረታችንን እንደሌሎች ብሔር ብሔረሰቦችና ህዝቦች መሪ ድርጅቶች መደገፍና ማገዝ ሲገባ ትህነግ/ሕወሓት ድርጊቱን ለራሱ በሚጠቅመው መንገድ በመረዳት ይቅርታ እንድንጠይቅበት መግለጫ ማውጣቱ ተደማሪ ታሪካዊ ስህተት ከመሆኑም በላይ የተከበረውን የትግራይ ህዝብ ባህልና እሴት የማይመጥን መላውን የኢትዮጵያ ህዝብ ያሣዘነ መግለጫ ነው ብለን እናምናለን፡፡ 
በእርግጥም ትህነግ/ሕወሓት ይህንን ወቅታዊ ሁኔታ የራሱን የዘመናት ወንጀሎች ለመሸፋፈን ተጠቅሞበታል፡፡ እውነትና ፍትህ ቢኖር ኖሮ ባለፉት ዘመናት በትህነግ/ሕወሓት የሴራ ፖለቲካ ምክንያት ለተለያየ ጥፋት እና እንግልት በተዳረገው መላው የኢትዮጵያ ህዝብና ቅርቃር ውስጥ በወደቀው አገራዊ አንድነታችን ምክንያት ከወገቡ ዝቅ ብሎና ከልቡ ተፀፅቶ የተበደለውን ህዝብ ይቅርታ መጠየቅ የነበረበት ዋነኛው ተጠያቂ ትህነግ/ህወሓት መሆኑን እንረዳለን፡፡ በተጨማሪም ትህነግ/ህወሓት ድርጅታችን አዴፓን በዚህ ደረጃ ጥርስ ውስጥ ያስገባበት መሰረታዊ መነሻ ለዘመናት ሲሰራው የነበረውን ጸረ – ህዝብና ጸረ – ዴሞክራሲያዊ ተግባር ከሌሎች የለውጥ ኃይሎች ጋር ሆነን በግንባር – ቀደምትነት አምርረን በመታገላችንና ጥፋቱ በኢትዮጵያ ህዝቦች ፊት በመጋለጡ ነው፡፡ ይህም ሆኖ ድርጅታችን አዴፓ በኢህአዴግ ግንባር ውስጥ ከትህነግ/ህወሓት ጋር አብሮ እየታገለ መቆየቱን የመረጠው ለትግራይ ህዝብ ካለን ክብር እንዲሁም ትህነግ/ሕወሓትም እራሱ ተፀፅቶ እራሱን ያርማል በሚል ተስፋ ቢሆንም ትህነግ/ሕወሓት በነበረበት ተቸክሎ የሚዳክር ድርጅት በመሆኑ ድርጅታችን አዴፓን ይቅርታ እንዲጠይቅና ከአዴፓ ጋር አብሮ ለመሥራትም የሚቸገር እንደሆነ አድርጐ መቅረቡ “ሆድ ሲያውቅ ዶሮ ማታ” የድርጅቱ የሴራ ፖለቲካ መገለጫ ነው፡፡

ትህነግ/ሕወሓት መቼም ቢሆን ከብልሹ ፖለቲካ የማይፈወስ ድርጅት በመሆኑ በተደጋጋሚ የህዝባችን የጐን ውጋት ሆኖ በተለያዩ የክልላችን አካባቢዎች እና አጐራባች ክልሎች ከግጭቶች ጀርባ መሽጐ እንደሚያዋጋ እያወቅንም፣ ለዚህም በርካታ ማስረጃዎች በእጃችን ላይ እያሉ ለህዝቦች የእርስ በእርስ ግንኙነትና ለኢትዮጵያ አንድነት ስንል በሆደ-ሰፊነት ብንመለከተውም፣ ዛሬም እንደ ትላንቱ የትግራይ ህዝብ እንደሌሎች ወንድምና እህት ኢትዮጵያዊያን ሁሉ ከችግር እና ሰቆቃ ባልተላቀቁበት ነባራዊ ሁኔታ ፣ የራሱን እኩይ ወንጀል ለመሸፋፈን፣ በትግራይ ህዝብ ሲምልና ሲገዘት የሚውል ህዝቡን ለጥቃት በሚያጋልጡ ተንኮሎች የተጠመደ የማይማር እና የማይድን ድርጅት ነው፡፡ በመሆኑም ትህነግ/ሕወሓት ጥርሱን ነቅሎ ባደገበት የሴራ ፖለቲካ እየተመራ፣ ከልክ በላይ በእብሪተኝነት ተወጥሮ በየአካባቢው ጦር እየሰበቀ እና በበሬ ወለደ አሉባልታ ወንድም የሆነውን የትግራይ ህዝብ በተለይም ወጣቱን ለጥፋት እያነሳሳ ለተለያዩ አደጋዎች ተጋላጭ እንዲሆን እየገፋፋው ይገኛል፡፡ 
በአጠቃላይ ድርጅታችን አዴፓ እና የአማራ ህዝብ እንደወትሮው ሁሉ ለኢትዮጵያ አንድነት እና ለህዝቦች እኩልነት እንዲሁም ለእውነተኛ ዴሞክራሲ፣ ለእውነተኛ የፌዴራሊዝም ስርዓትና ለእውነተኛ ህገ-መንግስታዊ ስርዓት በፅናት የሚታገል እንጂ ተንኳሽ እና ጦር ሰባቂ እንዳልሆነ እየታወቀ በተሣሣተ መረጃ ጭቁኑን የትግራይ ህዝብ እና የኢትዮጵያን ብሄር፣ ብሔረሰቦችና ህዝቦች የሌለ ስጋት በመፍጠር አዴፓንና የአማራን ህዝብ ተጠርጣሪ ለማድረግ የሚያደርገው ተከታታይ ቅስቀሳ መወገዝ ያለበት መሆኑን በፅኑ በማመን የሚከተሉትን የአብሮነትና የአጋርነት ጥሪ እናስተላልፋለን፡፡

1. ለመላው የድርጅታችን አዴፓ አመራሮች፣ አባላትና ደጋፊዎች፣ 
አዴፓ ህዝባዊነቱን እንደያዘ ለኢትዮጵያ ዴሞክራሲያዊ አንድነት እና ለብሔር፣ ብሔረሰቦች እኩልነት የታገለና የሚታገል የዛሬና የነገ ዴሞክራሲያዊ ፓርቲ ነው፡፡ በመሆኑም ለዓላማዎቹ ግብ መሣካት መስዋዕትነት የከፈሉትን ጓዶች ዓላማ ዳር ለማድረስ በፅናት የሚታገል የአማራ ህዝብ ፓርቲ እንጂ እንደ ትህነግ/ሕወሓት ላሉ የሴራ ሃይሎች የሚያጐበድድ ፓርቲ አይደለም፡፡ እንደሚታወቀው በሰኔ 15/2011 ዓ.ም በደረሰብን አደጋ ጉዳታችን ጥልቅ ቢሆንም መላ መዋቅራችንን፣ ህዝቡንና የፀጥታ ሀይሉን ከጐናችን አሠልፈን እኩይ ሴራውን መቆጣጠራችንና እና ማክሸፋችን የሚታወቅ ነው፡፡ ክልላችን ከደረሰብን አደጋና ችግር ፈጥኖ እንዲወጣ ሰፊ የማረጋጋት ሥራ በመስራት አሁን ከመቸውም ጊዜ በላይ ወደ-ላቀ ጥንካሬያችን እየተመለስን ሲሆን፣ በወንጀል ድርጊቱ በቀጥታም ይሁን በተዘዋዋሪ የተሳተፉ አካላትን ለህግ በማቅረብ ላይ ስንሆን፣ የምርመራ ሥራውም በጥብቅ ዲሲፕሊንና በተቀናጀ አግባብ እየተመራ ይገኛል፡፡ በመሆኑም አጠቃላይ የምርመራ ሥራውንና የህግ ተጠያቂነትን የማረጋገጡን ተግባር በቁርጠኝነት ዳር የምናደርሰው ሲሆን በዚህ ወቅት አደጋውን ለመቀልበስ ከጎናችን ተሰልፎ ሊታገል የሚገባው እህት ድርጅት ትህነግ/ሕወሓት በድርጅታችን እና በአማራ ህዝብ ላይ የከፈተውን የጥፋት ዘመቻ በፅናት በመመከት ለአማራ ክልል ህዝቦች እኩል ተጠቃሚነትና ለጠንካራ ኢትዮጵያዊ አንድነት የጀመርነውን አገራዊ ለውጥ አጠናክረን እንድንቀጥል ጥሪያችንን እናቀርባለን፡፡

2. ለክልላችን ህዝቦች እንዲሁም በኢትዮጵያና በመላው አለም የምትገኙ የአማራ ተወላጆች 
አሁን ባለንበት ነባራዊ ሁኔታ ከመቼውም ጊዜ በላይ አንድነታችንን ጠብቀንና ህብረታችንን አጠናክረን፣ የቀደመ ታሪካችንን ሣንሸራርፍ ለኢትዮጵያ ዴሞክራሲያዊ አንድነትና ለብሔር፣ ብሔረሰቦች እኩልነት፣ በአብሮነት መንፈስ በፅናት የምንታገልበት ታሪካዊ ወቅት ላይ መሆናችን፣ የበለጠ የሚያስተሳስረንና የሚያዋህደን እንጂ ከውስጥም ሆነ ከውጭ በሚሸረብ ሴራ የማንለያይና የማንነጣጠል በመሆናችን፣ የትላንት እኩይ ሴራቸውን ዛሬም ሣይረሱ ወቅታዊ ችግሮቻችን እንደምቹ አጋጣሚ በመጠቀም አንገት ሊያስደፉን ከሚፈልጉ ትህነግ/ሕወሓትና መሰል የጥፋት ሃይሎች የማንበገር መሆናችንን በፅናት እየገለፅን ከድርጅታችን አዴፓ ጐን ተሰልፋችሁ ለክልሉ ዘላቂ ሰላም፣ ቀጣይነት ለሚኖረው ልማትና ዋስትና ላለው ዴሞክራሲ በአንድነት እንድትቆሙ ጥሪያችንን እናስተላልፋለን፡፡

3. ለተከበራችሁ የኢትዮጵያ ብሔር፣ ብሔረሰቦችና ህዝቦች፣ 
ድርጅታችን አዴፓ እና የአማራ ህዝብ ባጋጠመው ፈተና ሁሉ ከጐናችን በመሰለፍ አጋርነታችሁን ስላረጋገጣችሁልን በዚህ አጋጣሚ ምስጋናችንን እያቀረብን ዛሬም እንደትላንቱ ለኢትዮጵያ ብሄር፣ ብሔረሰቦችና ህዝቦች እኩልነት፣ ፍትሀዊ ተጠቃሚነት፣ ለእውነተኛ ዴሞክራሲ እና የፌዴራሊዝም ስርዓት፣ እንዲሁም ለሃቀኛ ህገ-መንግስታዊ ስርዓት ከጐናችሁ ሆነን በፅናት የምንታገል መሆኑን እያረጋገጥን፣ ትህነግ/ሕወሓት የዘመናት ወንጀሎቹን ለመሸፈን እና ድርጅታችን አዴፓና የአማራ ህዝብን የሌሎች ህዝቦች ጠላት በሚያደርግ የተሳሳተ አስተምህሮ ዛሬም በጥርጣሬ እንድንተያይ የሚነዛውን የማደናገሪያ ትርክት መሰረተ ቢስ መሆኑን እንደምትገነዘቡ ጽኑ እምነት ያለን ሲሆን ይህን ጸረ ዴሞክራሲና አስመሳይነት ከጐናችን ተሰልፋችሁ በፅናት እንድትታገሉ ጥሪያችንን እናስተላልፋለን፡፡

4. ለተከበርከው የትግራይ ህዝብ 
የአማራና የትግራይ ህዝቦች ታሪካዊ አንድነትና ውህደት ያላቸው፣ ባህላዊና ጥንታዊ ሃይማኖታዊ እሴቶችን የሚጋሩ፣ በጋብቻና በደም የተሳሰሩ፣ በፀረ-ጭቆና ትግል ከሌሎች ህዝቦች ጋር ሆነው በአንድ ጉድጓድ ክቡር መስዋዕትነት እየከፈሉ አሁን ላለንበት የአገረ-መንግስት ምስረታ ጉልህ አሻራ ያሳረፉ ህዝቦች ናቸው፡፡ ሆኖም ትህነግ/ሕወሓትና መሠል እኩይ ድርጅቶች በህዝብ ስም እየማሉና እየተገዘቱ፣ በትግራይ ህዝብ ስም እየነገዱ ከሦስት ሺህ ዓመታት በላይ የዘለቀውን የአብሮነት ታሪካችንን በአራት አስርት አመታት የበሬ ወለደ ትርክቶች ለመሸርሸርና ህዝባዊ አንድነታችንን አደጋ ላይ ለመጣል የሚያደርጉት ሴራ መሆኑን አውቃችሁ ከአማራ ህዝብ ጋር ያላችሁ ወንድማዊና ቤተሰባዊ ግንኙነታችሁ ሳይቋረጥ ሁለቱን ህዝቦች የሚያለያዩ ሙከራዎችን በፅናት እንድትታገሉ የከበረ ጥሪያችንን እናቀርብላችኋለን፡፡

5. ለእህትና ለአጋር የፖለቲካ ድርጅቶች
እንደሚታወቀው ሁሉ አገራችን ኢትዮጵያ ካሏት ዘርፈ ብዙ ጸጋዎችና እሴቶች መካከል ብዝሀነታችን የምንደምቅበት ጌጣችን መሆኑ ለአፍታም ቢሆን አይዘነጋም፡፡ ይሁን እንጂ ትህነግ/ህወሓት ይህን የብዝሀነት ጸጋ ጠብቆ ለማስቀጠል ብቸኛ ተቆርቋሪ በመምሰል ሲያሻው ደግሞ በህዝቦች መካከል የጥርጣሬ አጥር በመፍጠር ህዝባዊ አንድታችንን ለማላላት የከፋፋይነት ፖለቲካውን ሲያራምድበት በመቆየቱ ምክንያት በለውጥ መድረካችን በአንድነት የረገምነው መሆኑ ይታወቃል፡፡ ስለሆነም ዛሬም እንደትላንቱ ለብሄር ብሄረሰቦች ጥያቄ የተለየ ትኩረት የሰጠ በመምሰል ይህንኑ የአስመሳይነት ድራማውን በኢትዮጵያ አንድነት ላይ ሲተውን የሚስተዋል ስለሆነ ይህን መሰል እኩይ ተግባር በአንድነትና በጽናት በመፋለም ህዝባዊና አገራዊ አንድነታችንን ጠብቀን የተጀመረውን ለውጥ አጠናክረን እንድናስቀጥል ጥሪያችንን እናቀርባለን፡፡

6. ለኢፌዴሪ የአገር-መከላከያ ሠራዊትና ለክልላችን የፀጥታ ሃይሎች 
ድርጅታችን አዴፓ እና የአማራ ህዝብ የአገር መከላከያ ሠራዊታችንና የክልላችን የፀጥታ ሃይሎች ህዝባዊነታችሁን ጠብቃችሁ ለአንዲት ሉአላዊት አገር መከበርና ቀጣይነት ክቡር መስዋዕትነት በመክፈል ላይ መሆናችሁን እንገነዘባለን፡፡ ጥንትም ቢሆን ኢትዮጵያ የተመሰረተችውና ጸንታ የቆየችው በጀግኖች አርበኞቻችን ተጋድሎና መስዋዕትነት በመሆኑ፣ በቅርቡም አጋጥሞን በነበረው አደጋ ፈጥኖ ደራሽነታችሁን በማረጋገጥ ክልላችንና አገራችንን ከጥፋት በመታደጋችሁ ምስጋናችንን እያቀረብን ወደፊትም የአገራችንን ሉአላዊነትና የክልላችንን ሁለንተናዊ ደህንነት በማስጠበቅ ሂደት የሚያጋጥሙንን ፈተናዎች ሁሉ በፅናት በማለፍ ህዝባዊነታችሁን እንድታረጋግጡ ጥሪያችንን እናቀርባለን፡፡

በመጨረሻም በክልላችንም ሆነ ከክልላችን ውጪ በአማራና በክልሉ ህዝቦች ስም የምትንቀሳቀሱ ተፎካካሪ የፖለቲካ ኃይሎች እየሰፋና እየጠነከረ በመጣው የፖለቲካ ምህዳር አዎንታዊ ሚና እድትጫወቱ ጥሪያችንን እያቀረብን በሌላ በኩል በቀጥታም ይሁን በተዘዋዋሪ የትህነግ/ሕወሓትን የፖለቲካ ደባ የምታስፈፅሙ ተላላኪ የፖለቲካ ሃይሎችና ቡድኖች ከዕኩይ ድርጊታችሁ እንድትቆጠቡ በጥብቅ እያሳሰብን ድርጅታችን አዴፓም ሆነ የአማራ ህዝብ ከሌላው የኢትዮጵያ ብሔር ብሔሰቦች ጋር ሆነን ለኢትዮጵያ ዴሞክራሲያዊ አንድነት እና ለብሔር ብሔረሰቦች እኩልነት የሚደረገውን ትግል አጠናክረን የምንቀጥል መሆኑን በድጋሚ እናረጋግጣለን፡፡

የአዴፓ ሥራ አስፈፃሚ ኮሚቴ 
ሐምሌ 4/2011 ዓ.ም

ከህወሓት ማእከላይ ኮሚቴ የተሰጠ መግለጫ

የህወሓት ማእከላይ ኮሚቴ ሀምሌ 2፣ 2011 ዓ/ም ባካሄደው የአንድ ቀን አስቸኳይ ስብሰባ በቅርቡ ባጋጠመው የከፍተኛ ወተሃደራዊ መሪዎችና የአማራ ክልል አመራሮች ላይ የጋጠመው ግድያ መነሻ በማድረግ በአገሪቱ እየተባባሱ በመጡት ሁለንተናዊ ችግሮች ይህንን ተክተለው ወደፊት ሊኖር ከሚችለው አጠቃላይ ሁኔታ ለሃገራችንም ሆነ ለክልላችን ከሚኖራው ትርጉም አንፃር በመገምገም በአስቸካይ ሊፈፀሙ የሚገባቸዉ ወሳኝ አቅጣጫዋችና ውሳኔዎች አስቋምጧል፡፡

በዚህ ወቅት የሃገራችን ህልውና ከከፋ ወደ ባሰ ደረጃ ሊወሰድ የሚችል በመጠኑና ስፋቱ እጅግ አሳሳቢ በሆነ ሁኔታ ላይ እንገኛለን፡፡ በየግዜው እየተከማቸ የመጣው በተለይም ካለፈው አመት ጀምሮ የአገሪቱን ህልውና አደጋ ላይ የሚጥሉ ሁኔታ እየተበራከተ የአደጋው ፍጥነት በየቀኑ እየጨመረ በመሄድ በቅርቡ በከፍተኛ የአገሪትዋ ወታደራዊና የክልል አመራሮች ላይ ያጋጠመው በግፍ የመግደል ደረጃ ደርሰዋል፡፡

ትላንት የአገሪቱ ህልውና ክብር አሳልፎዉ የሰጡና ኢትዮጽያን ለመበታተን ሌት ተቀን የማይተኙ ሃይሎች በስመ ለውጥ ግንባር በመፍጠር አሰላለፍ ባልለየ መልኩ ተደብላልቆ አንድ ላይ እንዲሆኑ በመደረጉ በጥፋት ላይ ጥፋት እየተደራረበ አሁን ላለንበት ደረጃ ላይ በቅተናል፡፡ በተቃራኒው ደግሞ ለዚች ሃገር ክብርና ህልውና ሲሉ እድሚያቸዉ ልክ የታገሉትን የሚታደኑበት፣ የሚታሰርበት እና ጥላሸት የሚቀቡበት ሁኔታ ተፈጥራዋል፡፡

ህዝቦች በሰላም እጦት ሳብያ እንዲሰቃዮ፣ ዜጎች በማንነታቸው ምክንያት ህይወትና ንብረታቸው የሚያጡበት፣ እንዲሸማቀቁ፣ መጠለያ አጥተው ብርድና ፀሃይ እየተፈራረቃቸው እንዲጣሉ፣ በሃገሪቱ ታይቶ በማይተወቅ ደረጃ የግጭትና በሚልኖች የሚቆጠሩ ዜጎች የመፈናቀል አደጋ የተበራከተበት፣ ከምንም ግዜ በላይ ህግና ስርዓት ማክበር ያልተቻለበት፤ ሃገር ጠባቂ አጥታ ፅንፈኛ ሃይሎች የሚፈጥዙባት እየሆነች ፀረ ህገ መንግስትና ፌደራላዊ ስርዓት የሆኑ ፅንፈኛ የትምክህት ሃይሎች እንዳሻቸው የሚሆኑበት ሁኔታ ተፈጥርዋል፡፡

ህወሓት የትምክህት ሃይሎች ሲል፣ የህዝብ መብትና ጥቅም ረግጠው የግል ፍላጎታቸውና ያሻቸውን ለመፈፀም የሚጋጉትን ጥቂት ሃይሎች እንጂ ህዝብን ፈረጅ አያውቅም አይችልምም፡፡
በማንኛውም መመዘኛ ትምክህተኛ ተብሎ የሚጠራ ህዝብ የለም:: የሁሉም ህዝቦች ፍላጎት እና መሻት አንድና ተመሳሳይ ነው፡፡ ሰለሆነ ወዳጅም ጠላትም ማወቅ ያለበት ህወሓት ትላንት፣ ዛሬም ሆነ ነገ ለህዝብ የላቀ ክብር የሚሰጥና ህዝባዊ እምነትም አንግቦ የሚታገል ድርጅት መሆኑ ነው፡፡ ባለፉት ግዚያት ከአማራ ህዝብ ጎን በመሰለፍ ፀረ ትምክህተኛና ገዢ መደቦች የታገለና የላቀ መስዋእትነት የከፈለ ድርጅት ነው፡፡

ስለ ሆነም የአማራ ህዝብ ትምክህተኛ ብሎ ሊጠራ አይችልም:: ሆኖም እነዚህ ፀረ ህዝብ የትምክህት ሃይሎች የቆየውን ሃላቀር ህልማቸው ለማስፈፀም እንደ ህዝብ ትምክህተኛ ተብለሃል በማለት ህዝበን እያደናገሩ ይገኛል፡፡በአማራ ህዝብ ስም እየነገዱ በአሉባልታ ወሬ ህዝቡ ላይ እንደ መዥገር ተጣብቀዉ ደሙን ለመምጠጥ አኮብኩቦው እየጠበቁ ይገኛሉ፡፡ ቢሆንም ግን እንደ ማነኛውም የኢትዮጽያ ህዝብ የአማራ ህዝብም ለሰላም፣ ለልማትና ዴማክራሲ ሲል መስዋእት በመክፈል አዲስትዋን ኢትዮጽያ በመፍጠር የራሱ ሚና የነበረውና ያለው ህዝብ ነው፡፡

ተጀምሮ የነበረዉ ተስፋ ሰጪ ልማትና እድገት ብአሁኑ ወቅት መሪ አልባ ሁኖ ቅልቁለት መውረድ የጀመረበት ሁኔታ ላይ ይገኛል፡፡ የፀጥታና የድህንነት ተቋማት ከምንም ግዜ በላይ የአገሩቱን ሰላምና ድህንነት መጠበቅ አልቻሉም፡፡ የጀግኖቹ የመከላከያ ሰራዊት ከፍተኛ አመራሮች ግድያ የሚያረጋግጠው እውነትም መንግስት የህዝቡን ሰላምና ድህንነት ማክበር ተስኖት በግፍና ጭካኔ የስልጣን ፍላጎታቸውን ማርካት የሚፈልጉ የትምክህት ሃይሎት እንዳሻቸዉ የሚፈነጩበት፣ በመንግስት መዋቅር ውስጥ መሽገዉ የህዝቦች አለኝታ የሆነዉን ህገ-መንግስትና የፌደራል ስርዓት ለማፍረስ በግላጭ የሚቀሳቀስበት ሆኔታ ተፈጥረዋል፡፡

በእንደዚህ አይነት ሁኔታም በየቀኑ ምን ሊፈጠር እንደሚችል ለመገመት አዳጋች የሆነበት ደረጃ ላይም ተደርሷል፡፡ የአገሪቱ ሁኔታ እዚህ ደረጃ ላይ መድረሱ እየታወቀም ከፍተኛ ባለስልጣናትን በማስወገድ በቀላሉ ስርአት የማፍረስ ተግባር በይፋ የሚያወግዝና የጠራ አቋም በመያዝ የሚደረግ ትግል አልታየም፡፡ በተቃራኒው ሁሉንም የለውጥ መሪዎች ነበሩ በማለት ይህንን እኩይ ተግባር ቀጣይነት እንዲኖረውና በዚህ ተግባር ላይ እጅ የነበራቸው አካላት ከተጠያቂነት እንዲያመልጡ ሆን ተብሎ ያለ ሃፍረት ጥረት እየተደረገ ይገኛል፡፡ ሌላው ቀርቶ የሃገሪቱ ሰላምና ደህንነት እንዲጠበቅ ሓላፊነት የተሸከሙ የፀጥታና የደህንነት አካላት በተፈፀመው ጥፋት ላይ ተጠያቂነትን በሚያረጋግጥ መንገድ እየተሰራበት አይደለም፡፡

በመሆኑም የሃገሪቱን ህልውና የከፋ አደጋ ላይ መሆኑን በመገንዘብ የህወሓት ማእከላይ ኮሚቴ ቀደም ብሎ ያስቀመጣቸውን የትግል አቅጣጫዎች በማጠናከር በቅርቡ ከተፈጠረው ሁኔታ በመነሳት የሚከተሉትን አቅጣጫዎችና ውሳኔዎች አስተላልፏል፡፡

1. በጀግኖች የመከላክያ ሰራዊት አመራሮች ላይ የተፈፀመው የግድያ ወንጀል ከሃሳብ ጀምሮ እስከ ተግባር በቀጥታና በተዘዋዋሪ ተሳትፎ የነበራቸው የውስጥና የውጭ ሃይሎች በገለልተኛ አገራዊ ወገን በፍጥነት እንዲጣራ፣ የፀጥታና ደህንነት አመራሮች በዚህ ሴራ ላይ የነበራቸውን ሚና ይሁን ግዴታዊ ሃላፊነታቸው ባለ መወጣታቸው ለተፈፀመው ጥፋት ተጠያቂ እንዲሆኑና የማጣራት ሂደቱና ውጤቱ በየግዜው ለኢትዮጵያ ህዝብ ግልፅ እንዲደረግ የህወሓት ማእከላይ ኮሚቴ ጥሪውን ያቀርባል፡፡

2. በዚህ ወቅት ሃገርን እየበታተነ ያለው ከዚህም ከዚያም የተሰበሰበው የትምክህት ሃይል ነው፡፡ ይህ ሃይል ዕድል አግኝቶ እንደፈለገው እንዲሆን እያደረገ ያለው ደግሞ አዴፓ ነው፡፡ በመሆኑም አዴፓ ባጠቃላይ በተፈፀመው ጥፋት፣ በተለይም ደግሞ በድርጅቱ አመራሮች ላይ ባጋጠመ ግድያ ላይ በጥልቀት በመገምገም ተጠያቂነት እንዲኖር በማድረግና ግልፅ አቋም በመውሰድ ለኢትዮጵያ ህዝቦች ይቅርታ መጠየቅ አለበት:: 
ከዚህ ዉጭ የውስጥ ችግሮችን ለመሸፈን ጥፋቱን በሶስተኛ ወገን አለበት በማለት ማሳበብ እና ሌሎች ረጃጅም እጆች አለበት ወዘተ በማለት ህዝቡን ማወናበድ መቆም አለበት፡፡ በእንደዚህ አይነት ሁኔታ ውስጥ መኖር እንደማይቻል ህዝቡም ተገንዝቧል፡፡ ስለዚህ አዴፓ በሁሉም ጉዳዮች ላይ የውስጥ ችግሮችን በዝርዝር በመገምገም ግልፅ አቋሙን እንዲያሳዉቅ የህወሓት ማእከላይ ኮሚቴ ጥሪዉን ያቀርባል፡፡ ይህ ሊሆን ካልቻለ ግን ህወሓት ከእንዲዘህ አይነት ሀይል ጋር አብሮ ለመስራትና ለመታገል እንደሚቸገር መታወቅ አለበት፡፡

3. እስከ አሁን የጋጠመው መሰረታዊ ችግር በኢህአዴግ ውስጥ በተፈጠረው የጐራ መደበላለቅና በግልፅ ወገንተኝነት ላይ በተመሰረተ ትግል እየታገዘ ሁሉንም ጥገኛና ደባል አስተሳሰቦች ተሸክሞ የሚኖር ድርጅት እየሆነ በመምጣቱ ነው፡፡ በመሆኑም የሃገራችንን ህልውናና ደህንነት ዋስትና እንዲኖረው ኢህአዴግ ወደ ነባሩና የሚታወቅበት መለያዉ የሆነ ባህሪና እምነት ተመልሶ ከጐራ መደበላለቕ በጠራና ግልፅ ወገንተኝነት የተመሰረት ትግል እንዲካሄድና በቀጣዩ አመት በህገ‐መንግስቱ መሰረተ መካሄድ ያለበትን ሃገራዊ ምርጫ እንደ ግንባርና መንግስት አቋሙን ለኢትዮጵያ ህዝቦች ግልፅ እንዲያደርግ የህወሓት ማእከላይ ኮሚቴ ያሳስባል፡፡

4. የአገር መከላከያ ሀይል ህገ‐መንግስታዊ ስርዓቱንና የአገሪቱን ሉአላዊነት ከማንኛውም አደጋ ለመከላከልና ለመጠበቅ የተሰጣችሁን ህገ-መንግስታዊ ሀላፊነት ከምንም ግዜ በላይ ውስጣዊ አንድነታችሁን በማጠናከር የአገራችሁን ሰላምና ደህንነት በመጠበቅ ረገድ ሃላፊነታችሁና ግዴታችሁን እንድትፈፅመ ጥሪ በማቅረብ ይህን ለመፈፀም በምታደርጉት ትግል ላይ ህወሓትና የትግራይ ህዝብ ዛሬም እንደ ትላንቱ ከጐናችሁ በመሆን በፅናት እንደሚታገል ያረጋግጥላቹሃል፡፡

5. ህወሓት ህገ-መንግስታዊና ፌደራላዊ ሃይል እንደ መሆኑ መጠን ህዝብና ሃገር ካለዉና ለወደፊትም ከተጋረጠባቸዉ አደጋ ለማዳን ተመሳሳይ ዓላማ ካላቸው ህገ-መንግስታዊና ፌደራላዊ ሃይሎች ጋር ሰፊ መድረክ በመፍጠር ለመታገልና ባስቸኳይ ወደ ተግባር እንዲሸጋገር የህወሓት ማእከላይ ኮሚቴ ወስኗል፡፡

6. በደቡብ ብሄር ብሄረሰቦችና ህዝቦች ክልል እየተነሱ ያሉትን ክልል የመሆን ጥያቄዎች ህገ-መንግስታዊ በሆነ መንገድ ሊፈቱ ይገባል፡፡ ከዚህ ውጭ የህዝብን ጥያቄ በሃይል ወይም በሌላ መንገድ ለመፍታት የሚደረግ ጥረት ፍፁም ተቀባይነት የለውም፡፡

7. የፌደራል መንግስት በዚህ ሃገር ዉስጥ አስተማማኝ ሰላም እንዲያረጋግጥ፣ ህግና የህግ የበላይነት እንዲያከብር፣ የዜጐች ሰብአዊና ዴሞክራሲያዊ መብቶች ሊያረጋግጥና ህገ-መንግስትና ህገ-መንግስታዊ ስርዓትን ሳይሸራረፍ እንዲተገብር የህወሓት ማእከላይ ኮሚቴ በድጋሚ ያሳስባል፡፡

የተከበርክ የትግራይ ህዝብ

በመስመርህና ድርጅችህ ዙርያ ተሰልፈህ በየግዜው ላጋጠመህ ቁጥር ስፍር የሌለው ሴራና ተግዳሮት በመበጣጠስ ወደፊት እየተራመድክ ትገኛለህ፡፡በፅናትህ፣ ትእግስትህና ብልህነትህ አማካኝነት ከያዝከው መንገድ ዝንፍ ሳትል በአላማህና መስመርህ ፀንተህ እየታገልክ ትገኛለህ:: ተስፋ እንድትቆርጥ፣ እንድትመበረከክና አንገትህ እንድትደፋ በማሰብ ኮትኩተህ እና አንፀህ ያሳደግካቸውን ምርጥ ታጋዮችህ እንድታጣ አድርገዋል፡፡ ቢሆንም ግን መስዋእት ላንተ አዲስ አይደለም፡፡ምርጥ ታጋይ ልጆችህን ከፍለህ ለዚህ በቅተሃልና:: አሁንም ቢሆን ያጋጠመህን ችግር አልፈህ ለበለጠ ትግል እና ለማይቀር ድል ተዘጋጅ፡፡ እውነተኛና ፍትሃዊ ትግል እስከካሄድክ ድረስ በአላማ ላይ የተመሰረተ ፅኑ አንድነትህን እስካረጋገጥክ መጪዉ ግዜህ በአንፀባራቂ ድል የታጀበ ነው፡፡ በመሆኑም አንድነትህ አጠናክረህ ከመስመርህና ከድርጅትህ ጐን ተስለፍ፡፡በየግዜው የሚፈጠሩትን ሁኔታዎች በንቃትና በትዕግስት ተከታተል፡፡

የተከበራችሁ የኢትዮጵያ ብሄር ብሄረሰቦችና ህዝቦች

ትላንት በድህነትና ኃላቀርነት ተቆራኝተን እንድንኖር ፈርዶብን የነበረውንና በህዝቦች መስዋእትነት ያስወገድነውን የትምክህት ሃይልና በሱ የሚመራዉ አሃዳዊ ስርዓት ዳግም አፈሩን አራግፎ በመነሳት በህዝብ ልጆች መስዋእትነት የተፃፈ የህዝቦች ቃልኪዳን የሆነውን ህገ-መንግስትና ዴሞክራሲያዊ ስርዓት ለማፍረስ በውስጥና በውጭ ሃይሉን አጠናክሮ ላይና ታች እያለ ይገኛል፡፡ ስለዚህም ሰላማችንና ህገ-መንግስታዊ ስርዓታችንን በመጠበቅ በዋነኝነትም ደግሞ የሃገራችንን ህልውና በማረጋገጥ ረገድ በጋራ እንድንታገል የህወሓት ማእከላይ ኮሚቴ ጥሪውን ያቀርባል፡፡

ክብርና ሞገስ ለጀግኖች ሰማእታት
የህዝባዊ ወያነ ሓርነት ትግራይ ማእከላይ ኮሚቴ
ሀምሌ 03/2011 ዓ/ም
መቐለ