ዲጂታል “ወያኔ”፤ የ “እረኛውን ግደል፣ መንጋው ይበተናል” መርህ ያስፈጽማል፤ መሪዎቹ የፌደራል መንግስቱን እንታደግና ህግ ይከበር ጥሪ ያሰማሉ

የተለየ ሃሳብ ያላቸው የፖለቲካ ድርጅቶች፣ መሪዎቻቸውና ደጋፊዎቻቸው  ” ባንዳ ” በሚል ከማህበራዊ ትሥሥር እንዲገለሉ የሚደረግባት የትግራይ ክልል መሪ ለዴሞክራሲያዊ ስርዓት ግንባታ ጠሪ አቀረቡ። ዜጎች በሰላም እንዲኖሩ የሕግ የበላይነት ሊከበር እንደሚገባም አሳሰቡ። ይህንን ሲሉ በህግ የሚፈለጉና እሳቸው ከለላ ስለሰጡዋቸው ተጠርጣሪዎች ግን ያሉት ነገር የለም።

ዶክተር ደብረፅዮን ገብረሚካኤል ሰላም የሰፈነባት፣ ህዝቦቿ በመከባበር የሚኖሩባትን ሀገር ለመገንባት ሁሉም የበኩሉን ሚና መወጣት እንዳለበት ማሳሰቢያ የሰጡት፣ “ህገመንግስትና ህብረ ብሄራዊ ፌዴራላዊ ስርዓትን ማዳን ለዴሞክራሲያዊ ሀገራዊ አንድነት” በሚል መሪ ቃል በመቀሌ ከተማ የተጀመረውን ሀገር አቀፍ የምክክር መድረክ መክፈቻ ስነ ስርዓት ላይ ባደረጉት ንግግር ነው።

በአገሪቱ ከተከሰተው ቀውስና አለመረጋጋት ጀርባ ስሙ የሚነሳው ህወሃት በመሪው አማካይነት “ባለፉት ጥቂት ዓመታት በታየው ፖለቲካዊ አለመረጋጋት የዜጎች መብቶች በአደባባይ ሲጣሱ የታየበት፣ ህዝቦች በነፃነት ተንቀሳቅሰው መስራት የማይችሉበት፣ ሃብት ለማፍራት የተቸገሩበት፣ ለጥቃት የተጋለጡበትና የህግ የበላይነት አደጋ ላይ የወደቀበት ነበር” በሚል ተገምግሟል። ቀደም ሲል ህወሃት አገሪቱን እየመራ በነበረበት ወቅት የተሻለ አመራርና የጽድቅ ጊዜ እንደነበር ተደርጎ ለመሳልም ተሞክሯል።

ሲፈለግ በዲጂታል ዝርጊዳቸው አማካይነት፣ ሲፈልጉም ራሳቸው ትግራይ ወደ መገንጠል እያመራች እንደሆነ የሚናገሩት የትግራይ ገዥ ዶክተር ሰብረጽዮን “ህገመንግስትና ህብረ ብሄራዊ ፌዴራላዊ ስርዓትን ማዳን ለዴሞክራሲያዊ ሀገራዊ አንድነት”  በምል ርዕስ በተጠራው ስብሰባ ላይ በሚመሩት ” የፌደራል ስርዓቱን እንጠብቅ ” ሲሉ ተደምጠዋል።

“አሁን ላይ በሀገሪቱ በስፋት እየተከሰቱ ያሉትን ችግሮች ህገ መንግስቱን ካለማክበርና የህግ የበላይነትን ካለማረጋገጥ የሚመነጩ ናቸው” ሲሉ አገር የሚመሩትን ወገኖች ሲወቅሱ፣ እሳቸው ያሉበት የኢህአዴግ ስራ አስፈሳሚ ሚና የት ጋር እንደሚመደብ ያሉት ነገር የለም። ሀገ መንግስት የጣሱት አካላትና ክልሎች እነማን እንደሆኑም አላብራሩም። በህግ ጥሰት በይፋ ስለሚከሰሰው የሳቸው አስተዳደርም የተነፈሱት ጉዳይ የለም።

“ብዝሃነትን መሰረት ያደረገው ፌዴራላዊ ስርዓት አሉታዊና አዎንታዊ ገፅታዎች እንዳሉት የማይካድ ሀቅ ነው” ሲሉ ተደምጠዋል። ይሁን እንጂ አሉታዊ ሲሉ ያነሱትን ጉዳይ አላብራሩም። ንግግራቸው አብዛኞች የስርዓቱ አወቃቀር ለብሄር ግጭት በር መክፈቱን፣ አገሪቱ የምትከተለው የነበረው ትክክለኛውን ፌደራልዝም ሳይሆን አለም የተፋው ” የጎሳ ፌደራሊዝም ” በመሆኑ ይህ ጣጣ ህወሃት ያመጣው እንደሆነ የሚደመጠውን ሃቅ በግርድፉ የመቀበል ተደርጎ ተውስዷል።

ዶክተር መንበረ ጸሃይ ባቀረቡት ጽሁፍ ህገ መንግስቱ በተለይ በብሄር ብሄረሰቦችና ህዝቦች ውስጥ የነበሩ መሰረታዊ የማንነት፣የሰላም እጦትና የመሬት ባለቤትነት ጥያቄዎችን የመለሰ መሆኑንም ደፍረው መናገራቸው ታውቋል። ይሁን እንጂ በስፍራው የተገኙ ” የመሬት ባለቤት ማን ነው” ሲሉ ጥያቄ ስለማቅረባቸው ዜናውን በዘገበው የፋና ሪፖርት ውስጥ የተካተተ ነገር የለም። እኚሁ ” በሚዛናዊ ፍርዳቸው የሚታወቁት የቀድሞ የጠቅላይ ፍርድ ቤት ፕሬዚዳንት “ህገ-መንግስትና ህገ-መንግስታዊ ስርዓት በኢትዮጵያ” በሚል ርዕስ የመወያያ ጽሑፋቸው፣ ” ህገ መንግስቱ ከመጽደቁና ተግባራዊ ከመደረጉ በፊትም በ22 ሺህ ቀበሌዎች ውስጥ በህዝብ ሰፊ ውይይት የተደረገበት ነበር” ሲሉ ሕዝባዊነት የተላበሰ አሰራር ተከትሎ የተዘጋጀ መሆኑንን መስክረዋል።

የትግራይ ክልል መሪ ሲነጋ ” እንደምን አደራቹህ፣ ሲመሽ ሰማ እደሩ” በማለት የሚንከባከቡት ዲጂታል ወያኔን አስመልክቶ ጎልጉል የሚከተለውን ዘግቧል። ህግ ይከበር የሚባለው ይህ እየተደረገ ነው።

ዲጂታል “ወያኔ”፤ “እረኛውን ግደል፣ መንጋው ይበተናል”

አገራችን ከህወሓት አፋኝ የግፍ አገዛዝ ወጥታ በለውጥ ሒደት ውስጥ ትገኛለች። ሆኖም በአፋኙ ዘመነ ወያኔ እንኳን ሆኖ በማያውቅ መልኩ በአሁኑ ጊዜ አገራችንን እያፈረሰ የሚገኘው በማኅበራዊ ሚዲያ እየተሰራጨ ያለው የሃሰትና የፈጠራ ዜና ነው። ለዚህ ደግሞ በርካታ መዋዕለ ንዋይ እየፈሰሰ ቀንተሌት ተግተው የሚሠሩ “የሳይበር ወታደሮች” ተመድበዋል። እነዚህ በተለይ በማኅበራዊ ሚዲያ ላይ በትጋት የሚንቀሳቀሱ ኃይሎች ዓላማቸው መረጃ ማዛባት፤ የሃሰት መረጃ መበተን፤ የሚወጡ መረጃዎችን ማወዛገብ (ሕዝብ እውነቱንና ሐሰቱን እንዳይለይ ማድረግ)፤ ወዘተ ናቸው።

ይህ በዕዝና ቁጥጥር የሚመራ ኃይል ዋና ትኩረት የሚያደርገው በለውጡ ዙሪያ ያሉትን አመራሮች ማጠልሸት፤ የሕዝብ ድጋፋቸውን ማምከን፤ ከተቻለም ሕዝብ እንዲነሳባቸው ማድረግ ነው። ከዚህም በተጨማሪ በልዩ ልዩ ረቂቅ ስልት በሚበትኑት መረጃ ሕዝብ ከሕዝብ ጋር እንዲጋጭ፤ ደም እንዲቃባ፤ ሰላም እንዲደፈርስ፤ ሕዝብ እንዲፈናቀል፤ ሕዝብ በመሪዎቹ ላይ እምነት እንዲያጣ በማድረግ “በአመራር ላይ ያለው ኃይል አገር ማስተዳደር አቅቶታል” በሚል በአገር ውስጥና በውጪ ተዓማኒነቱን ማሳጣት ነው።

ከዚህ ዓይነቱ እኩይ ተግባር ጋር በተያያዘ መገንኛዎች “መንግሥትን ከህዝብ የመነጠሉ ዘመቻ የተሳካ መሆኑ ተገመገመ፤ መንግሥት በሚስጢር የያዘው ኩዴታ የዚሁ አካል ነው” በሚል አንድ ዜና አስነብበዋል። ዜናው ከዚህ በታች እንደሚከተለው የቀረበ ሲሆን ጎልጉል የድረገጽ ጋዜጣ ከዚህ የዲጂታል ፀረ-ኢትዮጵያ ዘመቻ ጋር በተያያዘ ምን እየሆነ እንዳለ ሰሞኑን የሚያቀርበው ዘገባ ይኖራል፤ በቀጣይም አገር ለማፍረስ የተካሄደውን የግድያ ሤራ አስመልክቶ ከዚሁ የዲጂታል የፈጠራ ወሬ ወረርሽኝ ጋር ያለውን ተዛምዶ በተመለከተ የሚያቀርበው ዘገባ ይኖረዋል።

መንግሥት ለመግልበጥ ውስጥ ውስጡን የተዘረጋው መረብ መበጠሱን  የመረጃ ምንጮች አመለከቱ። ዕቅዱ የቆየ ቢሆንም ተግባራዊ ለማድረግ የተፈለገው የለውጡን መሪዎች ተቀባይነት ካመናመኑ በኋላ ሲሆን፣ ይህንኑ ተግባራዊ ለማድረግ የሕዝቡን ንቃተ ህሊናና ባህል ግንዛቤ ውስጥ በማስገባት በከፍተኛ በጀት፣ በባለሙያዎችና በማዕከላዊ ዕዝ ደረጃ የተደራጀ የማኅበራዊ ሚዲያ ሠራዊት (ዲጂታል “ወያኔ”) ትልቁን ሚና እንደተጫወተ ታውቋል።

የመረጃው ምንጮች እንዳሉት ከፌዴራል መንግሥት ቀጥሎ ከፍተኛ ሠራዊትና የትጥቅ አቅም ያደራጀው ቡድን፣ መንግሥት አመኔታ እንዳይኖረው ባሰማራው የማኅበራዊ ሚዲያ ሠራዊት አማካይነት ውጤታማ ሥራ መሥራቱን ግምግሟል። በግምገማውም ጠቅላይ ሚ/ር ዐቢይን ለይቶ መምታት የሚለው ስትራቴጂ ግቡን መትቷል። ለዚሁም በዋናነት የዜጎች መፈናቀል፣ በተለይም በሚፈለገው መልኩ የተጠለፈው የአዲስ አበባ የባለቤትነት አጀንዳ፣ የለገጣፎ ህገወጥ ግንባታ አፈራረስና “ኦሮሞ መምራት አይችልም” የሚለው ስልት ከሚፈለገው በላይ ሰርጿል። የለውጡ መሪዎች የገነቡት የሕዝብ ድጋፍ እንዲተን ተደርጓል።

ዳግም ወደ ሥልጣን ለመምጣት እየሠራ ያለው ቡድን ሃሳቡን እውን ለማድረግ ቢነሳ የሚገዳደረው ኃይል የመከላከያ ሠራዊት ብቻ እንደሆነ ገምግሞ የመከላከያው ሠራዊት ውስጥ ሰርጎ የመግባት ሰፊ ሥራ ሰርቷል። ወዳጅ አገራትና ታማኝ የሠራዊቱ አመራሮች ሤራውን እንዳከሸፉት የገለጹት የመረጃው ሰዎች “ውጥኑ ውስን የብሔር ድርጅቶችን እንዲያካትት ተደርጎ የተሠራ ነበር” ሲሉ ገልጸዋል። የብሄር ድርጅት ያሏቸውን ግን አልዘረዘሩም።

ከመከላከያ ሠራዊት ኤታማዦር ሹም ጄኔራል ሰአረ ግድያ ጋር ጉዳይ ግንኙነት ይኖረው እንደሆነ ለተጠየቁት ዝምታን የመረጡት ምንጮች፣ ሰሞኑንን የመከላከያ ሠራዊት ውስጥ ከፍተኛ መኮንኖች በውስጣቸው ምንም ዓይነት ችግር እንደሌለና ለሕገመንግስቱ ታማኝ ሆነው እንደሚሠሩ በተደጋጋሚ ያስታውቁት በምክንያት መሆኑንን ግን አልሸሸጉም።

የአሜሪካ የጦር መኮንኖች በሥልጠና ስም ወደ ኢትዮጵያ የገቡት ለዚሁ ዓላማ ይሁን አይሁን ምላሽ ያልሰጡት የዜናው ሰዎች፣ ሕዝብ “እረኛውን ግደል፣ መንጋው ይበተናል” የሚል መርህ ያዘለውን አገሪቱን የመበተን ሤራ በማስተዋል ቢመረምር እንደሚሻል ግን ጠቁመዋል።

ጠቅላይ ሚኒስትር ዐቢይ ባህር ዳር የተፈጠረውን ቀውስ ተከትሎ ድንገተኛ መግለጫ ሲሠጡ አዲስ አበባ ዙሪያ ሁሉንም ተቆጣጥረናል፤ ችግር የለም ማለታቸው ይታወሳል። እርሳቸው ዝርዝሩን ባይናገሩም የድሮው አውሮፕላን ማረፊያ በሚገኘው የደኅንነት ቢሮ አዲስ አበባ ላይ የታቀደውን ሤራ ሲያቀነባበር ተደርሶበት እጃቸውን እንዲሰጡ የተጠየቁ መታኮስ መርጠው መመታታቸውን ውስጥ አዋቂዎቹ እንደማሳያ ገልጸዋል።

በዚህ መልኩ ያቀረበውን ዘገባ በተለየም የጦር ኃይሎች አካባቢ ግድያና ተኩስ በተመለከተ በወቅቱ የአሶሼትድ ፕሬስ ጋዜጠኛ ኤልያስ መሰረት ጦር ኃይሎች አካባቢ ሰኔ 15 ቀን ምን እንደተከሰተ በወቅቱ ያሰባሰበውን መረጃ እንደዚህ ዘግቦት ነበር።

ሰኔ 15 ቀን አመሻሽ ላይ በአማራ ክልል እንዲሁም በአዲስ አበባ ውስጥ ቦሌ አካባቢ የተከሰተው ግርግር እና ግድያ ብዙ ትኩረት ቢስብም ጦር ኃይሎች በተለምዶ ሲግናል (በድሮ አጠራሩ መኮ) የተከሰተው ሁነት ግን እስካሁን ይፋ አልሆነም።

ጋዜጠኛ ኤልያስ ቢያንስ ሶስት ምንጮች አረጋገጡልኝ እንዳለው ጦር ኃይሎች አካባቢ በነበረው ግጭት ሁለት ወይም ሶስት ሰዎች ህይወታቸው አልፏል። እስከ ሌሊቱ ስድስት ሰዓት ገደማም የጥይት ተኩስ ይሰማ ነበር። ይህ ክስተት በዕለቱ ከነበሩት ሌሎች ግድያዎች ጋር የሚያያዝ እንደሆነ ግልፅ አይደለም።

በቅርቡ ስለ ጉዳዩ ጋዜጠኛው የጠየቃቸው አንድ የመንግሥት የሥራ ኃላፊ “ስለ ጉዳዩ መረጃ የለኝም፤ አጣርቼ መልስ ልሰጥህ እሞክራለሁ” የሚል ምላሽ ሰጥተው ነበር።

በጉዳዩ ዙሪያ መረጃ አለኝ ያለ አንድ ግለሰብ ለጋዜጠኛው ተከታዩን መረጃ አቀብሎ ነበር፦ “ስለ ሰኔ 15ቱ (የጦር ኃይሎች አካባቢ ጉዳይ) የተወሰነ መረጃ አለኝ። መረጃውን ላገኝ የቻልኩት ደግሞ በዛ ምሽት ከሞቱት ሶስት የፌዴራል ኮማንዶዎች አንዱ የአክስቴ ልጅ ስለነበር ሬሳ ለመቀበል ከቤተሰብ ጋር በሄድንበት ጊዜ የአሟሟቱ ጉዳይ ስለተነገረን ነው። እናም ጉዳዩ ከጄኔራሎቹ ግድያ ጋር በተያያዘ የተጠረጠረ አንድ ኮሎኔል ለመያዝ በሄዱበት ጊዜ በተፈጠረው የተኩስ ልውውጥ ምክንያት ነው። ግን እስካሁን አንድ የመንግሥት አካል ስለ ጉዳዩ ምንም ነገር አለማለታቸው እጅግ በጣም አሳዝኖኛል” በማለት የዓይን እማኝነቱን መስጠቱን ኤልያስ ዘግቧል።

በአማራና ቤኒሻንጉል ጉሙዝ ክልሎች ግጭት ዳግም እንዳይነሳ እየተሰራ ነው

የህዝብ ለህዝብ ግንኙነትን በማጠናከር በአማራና በቤኒሻንጉል ጉሙዝ ክልሎች ግጭት ዳግም እንዳይነሳ እየተሰራ መሆኑ ተገለጸ፡፡የሁለቱ ክልሎችን የዝብ ለህዝብ ግንኙነት በማጠናከር በሰላም እና መረጋጋት በተሰሩ ስራዎች ዙሪያ የሁለቱ ክልሎች ርዕሰ መሰተዳድሮች ከፋና ብሮድካስቲንግ ኮርፖሬት ጋር ቆይታ አድርገዋል፡፡

የአማራ ክልል ርዕሰ መስተዳድር አቶ ተመስገን ጥሩነህ እንዳሉት የሰላምና የልማት ትብብሮች በሁለቱ ክልሎች መካከል በቀጣይ የህዝቦችን ሰላም ለማረጋገጥ እየተሰራ ነው።

ግጭቶች ዳግም እንዳይቀሰቀሱም አመራሩን በመፈተሽ በህግ የሚጠየቁ አካላት ተለይተዋል፤ በቁጥጥር ስር ያልዋሉ አመራሮችን ለመያዝም ስራዎች እየተሰሩ ነው ብለዋል፡፡

በሁለቱ ክልሎች ወሰን አካባቢ ማንኛውም ህገ ወጥ እንቅስቃሴን በማቀብ በልማት የማስተሳሰር ስራ ላይ ትኩረት ተደርጎበት እንደሚሰራም ነው የተናገሩት ።

በተለያዩ ግጭቶች ከቀያቸው የተፈናቀሉትንም መልሶ የማቋቋም ተግባር እየተከናወነ እንደሚገኝም ጠቅሰዋል ። የቤኒሻንጉል ጉሙዝ ክልል ርዕሰ መስተዳድሩ አቶ አሻድሊ ሀሰን በበኩላቸው፥ የተሻለ ስራ መስራት ቢጠበቅም የባሰውን አደጋ በመፍታት አጎራባች አካባቢዎችን በፍጥነት ወደ ተለመደው ሰላማቸው ለመመለሰ የተደረገው ርብርብ ውጤታማ መሆኑን ይናገራሉ፡፡

በሁለቱ ክልሎች ወሰን አካባቢዎች የጸጥታው መደፍረስ በአካባቢው ያሉ ህዝቦችን አደጋ ላይ ጥሎ ከማለፍ በስተቀር ግጭቱ ለዘመናት የተገመደውን በአብሮነት የመኖር እሴት እንዳልቀየረው ነው የሚናገሩት፡፡ በህዝቦች መካከል ያለው ጉርብትና እና አብሮ የመኖር ባህል ዛሬም የጠነከረ ነው ብለዋል ርዕሰ መስተዳድሩ።

ከቤኒሻንጉል ጉሙዝ ክልል የተፈናቀሉ ዜጎችን ወደ ቀያቸው ለመመለሰ በተደረገው ጥረትም ከ7 ሺህ በላይ ተፈናቃዮች ወደ ቀያቸው መመለሳቸውን አንስተዋል። በቀጣዩ መስከረም ወርም የህዝብ ለህዝብ የውይይት መድረክ ይዘጋጃል ነው ያሉት፡፡

በሀይለየሱስ መኮንን –  (ኤፍ.ቢ.ሲ)

ወ/ሮ ሙፈሪያት ካሚል ከሃይማኖት መሪዎች ጋር በእምነት ተቋማት ላይ እያጋጠሙ ባሉ ችግሮች ዙሪያ መከሩ

የሰላም ሚኒስትር ወ/ሮ ሙፈሪያት ካሚል ከሃይማኖት መሪዎች ጋር በሀገር ደረጃ በእምነት ተቋማት ላይ እያጋጠሙ ባሉ ችግሮች ዙሪያ መከሩ፡፡

በምክክር መድረኩ ላይ የሰላም ግንባታ እና ብሔራዊ መግባባት ዘርፍ ሚኒስትር ዴኤታ ወይዘሮ አልማዝ መኮንን፣ የኢትዮጵያ ኦርቶዶክስ ተዋህዶ ቤተክርስቲያን ፓትሪያርክ ብጹእ ወቅዱስ አቡነ ማትያስ እና ብጹአን ሊቃነጳጳሳት ተሳትፈዋል፡፡

አሁን ላይ በሀገር አቀፍ ደረጃ በእምነት ተቋማት ላይ እያጋጠሙ ባሉ ችግሮች ዙሪያ ተዋያይተዋል፡፡

የሰላም ሚኒስትር ወይዘሮ ሙፈሪያት ካሚል በዚህ ውይታቸው የኢትዮጵያ ኦርቶዶክስ ተዋክዶ ቤተክርስቲያን ችግሮች ባጋጠሟት ጊዜ ሁሉ በአስተዋይነትና በአርቆ አሳቢነት ላለፈችበት መንገድም መንግስት ትልቅ አክብሮት እንዳለው ገልጸዋል፡፡

በእምነት ተቋማት ላይ እየተፈጸሙ ጥቃቶች የእምነት ተቋማቱን በተለያዩ መንገዶች የማወክ እንቅስቃሴዎች በአንድ ወይም በሁለት ተቋማት ላይ ብቻ የሚፈጸም ሳይሆን ሁሉንም እምነቶች ኢላማ ያደረጉ ናቸው ብለዋል፡፡

ተቋመቱ በሀገር ግንባታ ላይ የሚታይና የሚነበብ ታሪክ ያላቸው በመሆኑ በተቋማቱ ላይ የሚፈጸሙ ጥቃቶችም ሀገርን የማፍረስ ተልዕኮ ያነገቡ ሀይሎች የሚፈጽሙት በመሆኑ መንግስትና የሀይማኖት ተቋማት በቅንጅት መከላከል ይጠበቅብናልም ነው ያሉት፡፡

መንግስትም ዴሞክራሲን ከማስፋት ጎን ለጎን የህግ የበላይነትን የማረጋገጥ ተግባርን አጠናክሮ እንደሚቀጥልም ሚኒስትሯ አረጋግጠዋል፡፡

የኢትዮጵያ ኦርቶዶክስ ተዋህዶ ቤተክርስቲያን ፓትሪያርክ ብጹእ ወቅዱስ አቡነ ማትያስ ቤተ ክርስቲኗ ከተመሰረተችበት ጊዜ አንስቶ ለሀገር አንድነትና ሰላም የበኩሏን አስተዋጽኦ ስታበረክት መቆየቷን አስታውሰዋል፡፡

በተለያዩ ጊዜያት በቤተክርስቲያኗ ላይ የተለያዩ ጥቃቶች ሲፈጸሙ መቆየታቸውንና ቤተክርስቲያኗም ተልዕኮዋን ለመፈጸም እንቅፋት እየገጠማት እንደሆነ አስረድተዋል፡፡

እነዚህ ጥቃቶች ከጊዜ ወደጊዜ እየገዘፉ በመምጣታቸው መንግስት በወንጀል ፈጻሚዎች ላይ ህጋዊና አስተማሪ እርምጃ በመውሰድ ድርጊቶቹ እንዳይበራከቱ ሊያደርግ ይገባዋል ሰሉም አሳስበዋል፡፡

ከሰላም ሚኒስትር ያገኘነው መረጃ እንደሚያ መላክተው አዲሱን ዓመት ያሉብንን በርካታ ሀገራዊ ችግሮች አራግፈን ወደ ሰላም አመት እንድናመራ መላው ኢትዮጵያውያን፣ የእምነት ተቋማት፣ መንግስት እና የሚመለከታቸው ሁሉ ለሰላም መስፈን በጋራ መስራት ይጠበቅብናል ሲሉም በውይይቱ ማተቃለያ መልዕክታቸውን አስተላልፈዋል፡፡

(ኤፍ. ቢ.ሲ)

በሳዑዲ ዓረቢያ አውሮፕላን ማረፊያ ላይ ጥቃት ተፈጸመ

የየመን ሃውቲ አማጽያን በትናንትናው ዕለት በሳዑዲ ዓረቢያ አውሮፕላን ማረፊያ ላይ ጥቃት ፈፅመዋል። በኢራን  የሚደገፉት የየመን ሃውቲ አማጽያን በሰው ዓልባ አውሮፕላን በመታገዝ አብሃ በተሰኘው የሳዑዲ ዓረቢ አውሮፓላን ማረፊያ ላይ ጥቃት መሰንዘራቸው ተነግሯል።

የአማጽያን  ቡድኑ ጥቃቱን የፈጸሙትም የአሜሪካ እና ሳዑዲ ዓረቢያ ጥምር ጦር በቀጠናው ለሚያደርስባቸው ጥቃት አጸፋዊ ምላሽ መሆኑን አስታውቀዋል። በተፈጸመው ጥቃትም የአውሮፕላን ማረፊያ መቆጣጠሪያ ማዕከሉ ላይ ጉዳት ማድረሳቸው ነው የተነገረው።

ከዚህ ባለፈም በአውሮፕላን ማረፊያው ውስጥ በሚገኙ ሁለት የመንገደኞች ማረፊያ ክፍሎች ላይ ጥቃት መፈፀማቸው በዘገባው ተመላክቷል። ይሁን እንጂ የሳዑዲ ዓረቢያ መንግስት ጥቃቱን  አስመልክቶ እስካሁን ያለው ነገር የለም።

የመን የሃውቲ አማጽያን የአብድራቡህን መንግስት ከስልጣን ለማውረድ እንቅስቃሴ ከጀመሩበት ከፈረንጆቹ መጋቢት 2015 ጀምሮ የጦር አውድማ ሀና ቆይታለች።

ይህን ተከትሎም በሳዑዲ የሚመሩ ሃገራት ጥምር ጦር በመመስረት ለማዕከላዊ መንግስቱ ድጋፍ ያደርጋሉ። በሌላ በኩል  ኢራን የሃውቲ አማጽያንን በመደገፍ የአብድራቡህን መንግስት ለመጣል የሚደረገውን ጥረት ታግዛለች።

ሃገራት በውክልና በጀመሩት ጦርነት ሳቢያ እስካሁን ከ7 ሺህ በላይ የመናውያን ሲሞቱ በርካቶች ደግሞ ለስደት መዳረጋቸውን መረጃዎች ያመላክታሉ።

ምንጭ ፦ሬውተርስ – (ኤፍ ቢ ሲ) 

በባሌ ዞን መዳ ወላቡ ወረዳ 340 ኩንታል ስኳር ተያዘ

በባሌ ዞን መዳ ወላቡ ወረዳ 340 ኩንታል ስኳር ተያዘ በባሌ ዞን መዳ ወላቡ ወረዳ በሕገ ወጥ መልኩ ሊወጣ የነበረ 340 ኩንታል ስኳር መያዙን የዞኑ ፖሊስ መምሪያ አስታወቀ፡፡

ስኳሩ በህብረተሰቡ ጥቆማና በጸጥታ ኃይሎች ክትትል የተያዘው ከወረዳው ወደ ጉጂ ዞን ሲጓጓዝ መሆኑን በመምሪያው የኮሙኒኬሽን ጉዳይ ዲቪዥን ባለሙያ ኮማንደር ናስር ኡመር ዛሬ ለኢዜአ ገልጸዋል።

ኮድ 3 የሠሌዳ ቁጥር 79665 አዲስ አበባና ኮድ 3 የሠሌዳ ቁጥር 24685 ኢትዮጵያ በሆኑ የጭነት ተሽከርካሪዎች ስኳሩን ሲያጓጉዙ በቁጥጥር ሥር መዋላቸውንም ተናግረዋል።

አሽከርካሪዎቹ ለጊዜው መሰወራቸውንና የተያዘው ከ800ሺህ ብር በላይ ግምት ያለው ስኳር ለመንግሥት ገቢ መሆኑን ባለሙያው አመልክተዋል፡፡

ህብረተሰቡ ከፖሊስ ጋር በመቀናጀት ሕገወጥ ንግድን ለመቆጣጠር የሚያደርገውን ጥረት እንዲያጠናክርም ጠይቀዋል፡፡

የመንግስት ከፍተኛ የስራ ሃላፊዎች የስነ ምግባር ደምብ እየተዘጋጀ ነው

የመንግስት ከፍተኛ የስራ ሃላፊዎች የስነ ምግባር ደምብ እየተዘጋጀ ነው። የመንግስት ከፍተኛ ባለስልጣናት ከሃላፊነታቸው እና ከመወሰን ስልጣናቸው ጋር የሚጋጭ ነገር ሲያጋጥማቸው የጥቅም ግጭት አጋጠማቸው ይባላል።

በስነ ምግባር እና ጸረ ሙስና ኮሚሽን የኮሚሽኑ አማካሪ አቶ እውነቴ አለነ ከፍተኛ ባልስልጣኑ ሊያጋጥሙት ከሚችሉ የጥቅም ግጭቶች መካከል፥ ከፍተኛ የስራ ሃላፊዎቹ በሚመሩት ተቋም ውስጥ የቦርድ ሰብሳቢ ሆነው በሚመሩበት ጊዜ የጥቅም ግጭቶች ይከሰታሉ ተብሎ እንደሚታሰብ ይገልጻሉ።

አማካሪው እንደሚሉት ከሃብት ምዝገባ እና ማሳወቅ ጋር ተያይዞ መሰል ጉዳዮችን የሚያይ ድንጋጌ ቢኖርም፥ ድንጋጌው ግልጽነት የሚጎለው እና መሬት አውርዶ ለመተግበር አመቺነት የሌለው ነው።

እንደ ሀገር ባለስልጣኖቹ መሰል ጉዳዮችን የሚያስታርቁበት ወይም የሚከላከሉበት የራሱ የሆነ ወጥ ህግ የለም። ባለፉት አመታት ለመሰል ችግሮች መፍትሄ ሊሰጥ የሚችል ህግ ለማውጣት ሲሰራ ቢቆይም በተለያዩ ምክንያቶች እውን ሊሆን አለመቻሉንም ተናግረዋል።

አሁን ላይም ይህን ህግ አውጥቶ ተግባራዊ ለማድረግ የሚያስችል የህግ ማዕቀፍ ዝግጅት እየተደረገ መሆኑን ለፋና ብሮድካስቲንግ ኮርፖሬት ገልጸዋል።

አንድ ባለስልጣን ከቤተሰብ እና የቅርብ ከሚላቸው ዘመዶች ውጭ ሊቀበለው ስለማይገባው ስጦታ፣ ግብዣ እና ሌሎች ጥቅማ ጥቅሞች በግልፅ ገደብ የሚያስቀምጥ መሆኑንም አንስተዋል።

ባለስልጣኑም ከመሰል ችግሮች ራሱን መጠበቅ ካልቻለ ሊወሰዱ ስለሚችሉ እርምጃዎች የሚያስረዱ ይዘቶች የተካተቱበት መሆኑንም አስረድተዋል።

የስነ ምግባር ደምቡ ባለስልጣናትን ተጠያቂ ከማድረግ ባለፈ በህዝብ እና በከፍተኛ የመንግስት የስራ ሀላፊዎች መካከል ያለውን ያለመተማመን ክፍተት ለመሙላት አስተዋጽኦ ያደርጋል ተብሎ ታምኖበታል።

በትእግስት አብርሃም – FBC

በከፍተኛ የመንግሥት አመራሮች ላይ ሰኔ 15 የተፈጸመው ግድያ ዓቃቤ ሕግንና ተጠርጣሪዎችን እያወዛገበ ነው

በአማራ ክልል ከፍተኛ አመራሮች፣ በመከላከያ ሠራዊት ጠቅላይ ኤታ ማዦር ሹምና በጓደኛቸው ላይ ሰኔ 15 ቀን 2011 ዓ.ም. በተቀራራቢ ሰዓታት ውስጥ የተፈጸመው ግድያ፣ ዓቃቤ ሕግንና ከግድያው ጋር በተያያዘ ተጠርጥረው የታሰሩ ተጠርጣሪዎችን ማወዛገቡ ቀጥሏል፡፡

ግድያው በተፈጸመ ማግሥት ከሰኔ 16 ቀን 2011 ዓ.ም. ጀምሮ በቁጥጥር ሥር ውለው በተለያዩ ጊዜያት ፍርድ ቤት ሲቀርቡ፣ የተጠረጠሩት ከግድያው ጋር በተያያዘና የሽብርተኝነት ሕግን አዋጅ ቁጥር 652/2001 በመተላለፍ በሽብር ተግባር ወንጀል ተጠርጥረው መሆኑን የሚናገሩት ቁጥራቸው ከ30 በላይ የሚሆኑት ተጠርጣሪዎች፣ ግድያውን በሚመለከት የፌዴራልም ሆነ የክልል መንግሥት አመራሮች የተናገሩትና ያሰራቸው የፌዴራል ፖሊስ ወንጀል ምርመራ ቢሮ የሚናገረው የተለያየ መሆኑን ገልጸዋል፡፡

ተጠርጣሪዎቹ የሰኔ 15 ቀን 2011 ዓ.ም. ከፍተኛ አመራሮች ግድያን በማቀነባበርና በመሳተፍ ተጠርጥረው፣ በፌዴራል የመጀመርያ ደረጃ ፍርድ ቤት አራዳ ምድብ ችሎት ቀርበው በፀረ ሽብርተኝነት ሕጉ 28 ቀናት የምርመራ ጊዜ ተጠይቆባቸው ቢፈቀድም፣ ፖሊስ በተሰጠው ጊዜ ምንም ዓይነት ማስረጃ ሊያቀርብባቸው ባለመቻሉ፣ ፍርድ ቤቱ ሰፊ ትንታኔ በመስጠት በዋስ እንዲለቀቁ ውሳኔ ሰጥቶ እንደነበር ለፌዴራል ጠቅላይ ፍርድ ቤት ይግባኝ ሰሚ ችሎት አስረድተዋል፡፡ ተጠርጣሪዎቹ በጠበቆቻቸው አማካይነት ነሐሴ 15 ቀን 2011 ዓ.ም. ባቀረቡት ክርክር እንዳስረዱት፣ ለጠቅላይ ፍርድ ቤት ይግባኝ ያቀረቡት የፌዴራል የመጀመርያ ደረጃ ፍርድ ቤት ዝርዝር ትንታኔ በመስጠት ለደንበኞቻቸው የጠበቀላቸውን ሕገ መንግሥታዊ የዋስትና መብት፣ የፌዴራል ከፍተኛ ፍርድ ቤት ይግባኝ ሰሚ ችሎት ያላግባብ ስለነፈጋቸው ነው፡፡ የከፍተኛው ፍርድ ቤት ይግባኝ ሰሚ ችሎት ሕገ መንግሥታዊ የሆነውን የዋስትና መብት የነፈጋቸው፣ ተቋሙን በማይመጥንና የዳኝነትን ብቃት ግምት ውስጥ ሊያስገባ በሚችል ሁኔታ መሆኑን አስረድተዋል፡፡ ይኼውም አንድ የፀረ ሽብር ተግባር ወንጀል ፈጽሟል ተብሎ የተጠረጠረ ዜጋ በፀረ ሽብርተኝነት አዋጅ ቁጥር 652/2001 አንቀጽ 20 (3) ድንጋጌ መሠረት ምርመራ ሊፈቀድበት የሚችለው 28 ቀናት ሆኖ ተደንግጎ እያለ፣ በከፍተኛው ፍርድ ቤት ይግባኝ ሰሚ ችሎት በደንበኞቻቸው ላይ የተሰጠው የምርመራ ጊዜ 42 ቀናት መሆኑን አስረድተዋል፡፡ ይኼ ደግሞ የሕጉን ድንጋጌ ከመጣሱም በላይ፣ ምንም ዓይነት ማስረጃ ያልቀረበባቸው ተጠርጣሪዎችን ከሕግ አግባብ ውጪ እንዲታሰሩ ማድረግ መሆኑንም አስረድተዋል፡፡

ተጠርጣሪዎቹ ዓቃቤ ሕግ፣ የፖሊስ አባል፣ የአብን አመራሮችና አባላት፣ የተቋማት ሠራተኞችና ሌሎችም ሲሆኑ፣ በመዝገብ ቁጥሮች 181966፣ 181965፣ 182124፣ 182129 እና በመዝገብ ቁጥር 182150 ተካተው በአምስት መዝገቦች ከ30 በላይ ተጠርጣሪዎች የከፍተኛው ፍርድ ቤት ውሳኔን በመቃወም በሰባት ጠበቆች ተወክለው ሰፊ ክርክር አድርገዋል፡፡

የፌዴራል መንግሥትና የአማራ ክልል የመንግሥት አመራሮች በአማራ ክልል አመራሮች ላይ የተፈጸመው ግድያ ‹‹የመፈንቅለ መንግሥት ሙከራ ነው›› እያሉ በይፋ ከዕለቱ ጀምሮ በመገናኛ ብዙኃን ጭምር ገልጸው እያለ፣ ደንበኞቻቸውን በሽብር ተግባር ወንጀል መጠርጠር እርስ በርሱ የሚጣረስና ሕዝብንም እምነት የሚያሳጣ መሆኑን ጠበቆቹ ገልጸዋል፡፡

ፖሊስ ደንበኞቻቸውን በሽብር ተግባር ወንጀል ጠርጥሯቸዋል ቢባል እንኳን፣ በተፈቀደለት የ28 ቀናት ጊዜ ውስጥ ማን በማን ላይና ምን ዓይነት ወንጀል እንደፈጸመ በመለየት በዝርዝርና በተናጠል ለፍርድ ቤት ማቅረብ እንዳለበት በሕጉ ተደንግጎ ቢገኝም፣ 28 ቀናት ቆይቶ ፍርድ ቤት ሲቀርብ ምንም ዓይነት የምርመራ ውጤት አለማቅረቡን አስረድተዋል፡፡

የመጀመርያ ደረጃ ፍርድ ቤትም የፖሊስ ምርመራ መዝገቦችን አስቀርቦ ከመረመረ በኋላ፣ ምንም ዓይነት ለሽብር ተግባር ወንጀል የጥርጣሬ መነሻ ነገር ባለማግኘቱ፣ ተጠርጣሪዎቹ ከ2,000 ብር እስከ 5,000 ብር በሚደርስ ዋስትና ከእስር እንዲፈቱ ውሳኔ መስጠቱንም ገልጸዋል፡፡ ፖሊስ ‹‹በሽብር ተግባር ወንጀል ጠርጥሬያቸዋለሁ›› በማለት ላሰራቸው የአብን አባላት ያቀረበላቸው ጥያቄ፣ ‹‹ማንን ነው የምትረዱት? ማነው ያሰማራችሁ?›› የሚሉና ‹‹ጠርጥሬያችኋለሁ›› ካለበት መነሻ ሐሳብ ጋር የማይገናኝ መሆኑንም ጠበቆቹ ጠቁመዋል፡፡ ‹‹የአዲኃን ሥልጠና ወስዳችኋል፣ ከእነ ዘመነ ካሴ ጋር ግንኙነት አላችሁ›› የሚሉ የግለሰቦች ወይም የተወሰነ ቡድን ፍላጎትን የሚያንፀባርቁ ጥያቄዎች እንጂ፣ ከሰኔ 15 ቀን የከፍተኛ አመራሮች ግድያ ጋር የሚያያዝ ምንም ዓይነት ምርመራ እንዳልተካሄደባቸውም አስረድተዋል፡፡

አንዳንዶቹ በተለይ ዓቃቤ ሕግ አቶ የወግሰው በቀለና የአዲስ አበባ ፖሊስ ኮሚሽን ባልደረባና የልደታ ክፍለ ከተማ ፖሊስ መምርያ መርማሪ ዋና ሳጅን ሞገስ በቀለ፣ የባልደራስ ምክር ቤት አባል መሆናቸውን ደርሰንበታልና መረጃ ያቀብላሉ›› ከሚል ምርመራ በስተቀር፣ የሽብር ወንጀል ተሳትፏቸው ምን እንደሆነ ያቀረበው የጥርጣሬ መነሻ ማስረጃ እንደሌለም ገልጸዋል፡፡

‹‹የከፍተኛው ፍርድ ቤት ይግባኝ ሰሚ ችሎት ዋስትና የከለከላቸው አቋም ይዞ ነው፤›› የሚሉት የተጠርጣሪዎቹ ጠበቆች፣ ይኼንንም ሊያስብላቸው የቻለው በዋስ እንዲወጡ በፌዴራል የመጀመርያ ደረጃ ፍርድ ቤት እያንዳንዳቸው የ5,000 ብር ዋስትና ማቅረብ እንዳለባቸው ውሳኔ የተሰጠላቸው፣ አቶ የወግሰው በቀለና ዋና ሳጅን ሞገስ በቀለ፣ ዋስትናቸው ወደ 200,000 ብር ማሳደጉ ማሳያ መሆኑን ጠቁመዋል፡፡ ዋስትና ከተፈቀደላቸው ሳምንት ቢሞላቸውም፣ አቅማቸውን ያላገናዘበ ዋስትና በመሆኑ ከእስር ሊለቀቁ እንዳልቻሉም አክለዋል፡፡ ሌላው ጠበቆቹ ያቀረቡት ክርክር ሕጉ ግልጽ ሆኖ ሳለ፣ ለምን ተለጥጦና ለተጠርጣሪ በማይጠቅም ሁኔታ እንደሚተረጎም እንዳልገባቸው ጠቁመው፣ ከሰኔ 15 ቀን የእነ ጄኔራል ሰዓረ መኮንን ግድያ ጋር በተያያዘ፣ ‹‹የገዳዩ ሚስት ናት›› የተባለችና ከግድው ጋር ምንም ግንኙነት የሌላት ሴትም ታስራ እንደምትገኝ ገልጸዋል፡፡ ዳኞቹ የሚሠሩት ለህሊናቸውና ለሕግ ተገዥ ሆነው ቢሆንም፣ የመጀመርያ ደረጃ ፍርድ ቤት በአግባቡ የሰጠውን ውሳኔ ከፍተኛው ፍርድ ቤት ያገደበትና ከሕጉ ውጪ የሥራ ቀናትን ብቻ በመቁጠር በአጠቃላይ 42 ቀናት የፈቀደበት ሒደት፣ ከሕግ አግባብ ውጪ መሆኑንም አስረድተዋል፡፡ ፖሊስ ራሱ ጠይቆ የነበረው 28 ቀናት እንደሚበቃው ገልጾ ሲሆን፣ ፍርድ ቤቱ 42 ቀናት መፍቀዱ ለምንና በየትኛው የሕግ አግባብ እንደሆነ ግልጽ አለመሆኑንም አክለዋል፡፡ አዴፓ ‹‹እርስ በርሳችን ተጠፋፋን›› እያለ ከ30 በላይ ንፁኃን ዜጎችን ማሰር፣ ተገቢ አለመሆኑንም ገልጸዋል፡፡ መፈንቅለ መንግሥት መሆኑ የተገለጸበትን ድርጊት የሽብር ተግባር ወንጀል በማለት ዜጎችን ያላግባብ ማሰር ሆን ተብሎ ሰብዓዊ መብታቸውን ላለማክበር የተደረገ መሆኑንም ጠቁመዋል፡፡ ከፍተኛው ፍርድ ቤት ጠበቆችን ጭምር በነፃነት እንዳይከራከሩና እንዳይናገሩ ጫና በማድረግ፣ በክርክሩ ወቅት ያነሷቸውን መከራከሪያ ሐሳቦች እንኳን እንዳልመዘገበላቸውም አስረድተዋል፡፡ በአጠቃላይ ደንበኞቻቸው ታስረው የሚገኙበት ጉዳይ እንኳን በሽብር ተግባር ወንጀል፣ በተራ ወንጀል  እንኳን ሊያስጠረጥር እንደማይችል የተጠርጣሪዎቹ ጠበቆች በክርክራቸው አስረድተዋል፡፡

ከሰኔ 15 ቀን ከፍተኛ የመንግሥት አመራሮች ግድያ ጋር በተያያዘ በሽብር ተግባር ወንጀል ተጠርጥረዋል ስለተባሉትና ይግባኝ ስለጠየቁት ተጠርጣሪዎች፣ ጠቅላይ ፍርድ ቤት ቀርቦ ምላሽ የሰጠው (የተከራከረው) የፌዴራል ፖሊስ ወንጀል መርማሪ ሳይሆን ዓቃቤ ሕግ ነው፡፡ በዕለቱ የቀረቡት ሁለት ዓቃቢያነ ሕግ እንዳስረዱት፣ እያንዳንዳቸው ተጠርጣሪዎች ከሰኔ 15 ቀን 2011 ዓ.ም. በፊት ሲደራጁ ቆይተው፣ በተለያዩ አቅጣጫዎች በመንቀሳቀስ ግድያው እንዲፈጸም አድርገዋል፡፡ ይኼ ሁኔታ በተፈጸመበትና ፖሊስ ስለሁኔታው በማጣራት ላይ እያለ፣ የፌዴራል የመጀመርያ ደረጃ ፍርድ ቤት ተጠርጣሪዎቹ በዋስ እንዲወጡ ውሳኔ ሰጥቷል፡፡

ፍርድ ቤቱ ድርጊቱን ‹‹ተራ የፖለቲካ ሽኩቻ ነው›› በማለት የዳኛውን ገለልተኛነት የሚያጠራጥር መሆኑንም አክለዋል፡፡ ዓቃቢያነ ሕጉ እንዳብራሩት የመጀመርያ ደረጃ ፍርድ ቤት የምርመራ መዝገቡን ወስዶ ለሳምንት ማቆየቱና አልመልስም በማለቱ፣ እጃቸው ላይ በነበረ ሰነድ ለፌዴራል ከፍተኛ ፍርድ ቤት ይግባኝ ብለው፣ የተጠርጣሪዎቹ የዋስትና መብት እንዲታገድ ማድረጋቸውን አስረድተዋል፡፡ በተለይ አራት ተጠርጣሪዎች በኅቡዕ ጦር እየመሩ እንደነበርና መረጃ ሲለዋወጡበት የነበረን ማስረጃ ከብሔራዊ መረጃና ደኅንነት አገልግሎት ጠይቀው በመጠባበቅ ላይ እያሉ፣ ዋስትና መፍቀድ ተገቢ አለመሆኑንም ዓቃቢያነ ሕጉ ተናግረዋል፡፡

በግለሰብ እጅ ሊገባ የማይችል የጦር ሜዳ መነጽር መገኘቱንም ገልጸዋል፡፡ በአዲስ አበባ በወታደራዊ አመራሮች ላይ ግድያ ሲፈጸም የኤሌክትሪክ ኃይል እንዲቋረጥ ግዳጅ የተሰጣቸው፣ የኢትዮጵያ ኤሌክትሪክ አገልግሎት ሠራተኞች መያዛቸውንም ገልጸዋል፡፡ የጦር መሣሪያ መግዛቱንና 6,000 ጥይቶች ቢኖሩትም ከጎንደር እንዴት እንደሚያሳልፈው ምክክር ሲያደረግ የነበረ ተጠርጣሪና ሌሎችም፣ በኅቡዕ ተደራጅተው በእነማን ላይ ዕርምጃ እንደሚወስዱ ሥልጠና ጭምር የወሰዱ ተጠርጣሪዎች መሆናቸውንም ተናግረዋል፡፡ ይኼ ሁሉ ባለበት ገና በምርመራ ላይ እንደሆኑ እየገለጹ የመጀመርያ ደረጃ ፍርድ ቤት ዋስትና መፍቀዱ ተገቢ አለመሆኑን ገልጸዋል፡፡ በአጠቃላይ ከሰኔ 15 ከፍተኛ አመራሮች ግድያ ጋር በተያያዘ የሽብር ተግባር ስለመፈጸሙ ከተለያዩ የመንግሥት ተቋማት ጋር እየሠሩ እያለ፣ የወንጀል ተግባሩን በመቀየር ዋስትና መስጠቱም ተገቢ አለመሆኑን ዓቃቢያነ ሕጉ ደጋግመው አስረድተዋል፡፡

ፍርድ ቤቱ በመሀል፣ ‹‹በመጀመርያ ደረጃ ፍርድ ቤት በእያንዳንዱ ተጠርጣሪ ላይ ለወንጀል ጥርጣሬ መነሻ የሚሆን የምርመራ ውጤት አቅርባችሁ ነበር?›› የሚል ጥያቄ ለዓቃቢያነ ሕጉ አቅርቦላቸው፣ ማን ከማን ጋር ግንኙነት እንደነበረው በቂ መጠርጠሪያ ማቅረባቸውን ተናግረዋል፡፡ ቀሪ መረጃና ማስረጃ በመሰብሰብ ላይ እንደሆኑም ማስረዳታቸውን ከኢትዮ ቴሌኮም፣ ከባንክ፣ የባልደራስ ምክር ቤትን እንደ ሽፋን በመጠቀም ወንጀል መፈጸማቸውን ለማሳየት ከብሔራዊ መረጃና ደኅንነት አገልግሎት መረጃ መጠየቃቸውን ቢገልጹም፣ ፍርድ ቤቱ እንዳልተቀበላቸው አስረድተዋል፡፡

ከፍተኛው ፍርድ ቤት ግን ያቀረቡትን የይግባኝ አቤቱታ በሚገባ ከተመለከተ በኋላ፣ ዋስትናውን እንደሻረውም አክለዋል፡፡ ፍርድ ቤቱ በመቀጠል፣ ‹‹እናንተ (ዓቃቢያነ ሕጉ ወይም ፖሊስ) 28 ቀናት የምርመራ ጊዜ ጠይቃችሁ ከፍተኛው ፍርድ ቤት እንዴት ከዚያ በላይ ሊፈቅድ ቻለ?›› በማለት ሲጠይቃቸው፣ ችሎቱ የበዓል ቀናትን ትቶ የሥራ ቀናትን ብቻ በመቁጠር መስጠቱን ጠቁመው ስህተት ከሆነ ሊታረም እንደሚችል ተናግረዋል፡፡

ፍርድ ቤቱ በመቀጠል፣ ‹‹ከሰኔ 16 ቀን 2011 ዓ.ም. ጀምሮ በምርመራ ላይ ከሆናችሁ እንዴት እስካሁን አልጨረሳችሁም? አሁንስ በምን ላይ ናችሁ?›› የሚል ጥያቄ አቅርቦላቸው፣ ተጠርጣሪዎቹ ሲዘጋጁ የከረሙት ከጥቅምት ወር 2011 ዓ.ም. ጀምሮ መሆኑን፣ በቤንሻንጉል ጉምዝ ዋና ከተማ በአሶሳና በአዲስ አበባ የተፈጸመውን ሁሉ ማጣራት ስላለባቸው፣ እየሠሩና የጠየቁት ለመረጃ እስከሚመጣላቸው እየጠበቁ መሆኑን ተናግረዋል፡፡

የተጠርጣሪዎቹ ጠበቆች በተሰጣቸው ድጋሚ የመከራከሪያ ዕድል እንዳስረዱት፣ ዓቃቤያነ ሕጉ የምርመራ መዝገቡ በመጀመርያ ደረጃ ፍርድ ቤት ስምንት ቀናት በዳኛ ዕግድ መቆየቱን ለችሎቱ መግለጻቸው፣ ከአንድ ከፍተኛ የሕግ ተቋም የማይጠበቅ ምላሽ ከመሆኑም ባለፈ ግምት ውስጥ የሚከት መሆኑን አስረድተዋል፡፡ ፖሊስ የራሱን ዋና የምርመራ መዝገብ ይዞ ለፍርድ ቤት የሚያቀርበው ደግሞ ግልባጩን (ኮፒ) መሆኑን ጠቁመው፣ መዝገቡ ዳኛው ዘንድ ስምንት ቀናት መቆየቱንና ‹‹አልሰጥም አሉኝ›› የሚል ሰበብ ማቅረብ ተገቢ አለመሆኑን ገልጸዋል፡፡

ሌላው ዓቃቢያነ ሕጉ የምርመራ መዝገቡ አካል ያልሆነን ጉዳይ ‹‹አሶሳ ከተማ የተፈጸመን ድርጊትም እየመረመርኩ ነው›› ማለቱ የማይገናኝ ነገር ለማገናኝት መሞከር መሆኑንም አክለዋል፡፡ የጦር ሜዳ መነጽር ይዘው ተገኝተዋል በማለት ዓቃቢያነ ሕጉ ተጠርጣሪዎቹን ለመወንጀል ያደረገው ጥረት፣ ‹‹መነጽር አይደለም ታንክ ይዘው ቢገኙ ሽብር ነው ማለት ነው?›› በማለት ጠይቀው፣ ፍርድ ቤቱ መዝገቡን አስቀርቦ እንዲያይላቸው ጠይቀዋል፡፡ ተገኘ የተባለው የጦር ሜዳ መነጽር የዩኒቨርሲቲ ማስተማሪያና ከመምህር ቤት የተገኘ መሆኑንም አክለዋል፡፡ በኅቡዕ ተደራጅተው ጦር ሲመሩ ነበር የተባሉት ደንበኞቻቸው ጫማ የሚጠርጉ ሊስትሮዎች፣ የቤት ሠራተኞችና የፖለቲካ ድርጅት አባላት መሆናቸውንም አክለዋል፡፡

ግድያው ሰኔ 15 ቀን ተፈጽሞ ደንበኞቻቸው ሰኔ 16 ቀን መያዛቸው የሚገርም እንደሆነ የገለጹት ጠበቆቹ፣ ይኼ የሚያሳየው እነሱን ለመያዝ ዝርዝር ተይዞና ቀደም ብሎ ዝግጅት መኖሩ የሚያረጋግጥ መሆኑን ተናግረዋል፡፡ የፌዴራል የመጀመርያ ደረጃ ፍርድ ቤት የሽብር ተግባር ወንጀል አያስቀጣም ሳይሆን፣ በአዋጅ ቁጥር 652/2011 አንቀጽ (19) መሠረት ሊያስጠረጥራቸው የሚችል ማስረጃ እንዳልተገኘባቸው ወይም ፖሊስ በተሰጠው የ28 ቀናት የምርመራ ጊዜ ሊያቀርብ እንዳልቻለ መግለጹ እንደሆነ አስረድተዋል፡፡ ዓቃቢያነ ሕጉ ተጠርጣሪዎቹ የጦር ሥልጠና ሲያደርጉ እንደነበር መግለጻቸው ስህተት መሆኑን ጠበቆቹ ጠቁመው፣ መንግሥት ራሱ በጀት መድቦ ሲያሠለጥናቸው የነበሩ መሆናቸውን አክለዋል፡፡ በአጠቃላይ ፖሊስ እንኳን ማስረጃ ሊያቀርብባቸው ቀርቶ ቃላቸውን እንኳን እንዳልተቀበላቸውም ጠቁመዋል፡፡

ተጠርጣሪው ዓቃቤ ሕግ አቶ የወግሰው በቀለ ለሥር ፍርድ ቤቶች ከታሰረ 50 ቀናት እንደሞላው ሲያስረዳ፣ ፍርድ ቤቱ ለምን ምርመራ እንዳልጨረሰ ፖሊስን ሲጠይቀው፣ የባልደራስ ምክር ቤት አባል መሆኑን ስለደረሰበት እያጣራ መሆኑን እንደገለጸም አስታውሰዋል፡፡

የግራ ቀኙን ክርክር የሰማው የፌዴራል ጠቅላይ ፍርድ ቤት ይግባኝ ሰሚ ችሎት መርምሮ ውሳኔ ለመስጠት ለነሐሴ 22 ቀን 2011 ዓ.ም. ቀጠሮ ሰጥቷል፡፡

ሪፖርተር (ታምሩ ጽጌ)

አብይ አሕመድ – ደህና ይሰንብቱ? ትህነግ ወደ መንበር?

ለትግራይ ሕዝብ ነጻ አውጪ ግንባር /ትህነግ፣ ኦዴፓ ተላላኪ በነበረበት ዘመን የአብራክ ልጅ ተደርጎ ይወሰድ ነበር። ኦነግ ደግሞ በወቅቱ “ አልላላክም ” ብሎ ስለነበር አገር ጥሎ እንዲሰደድ የተፈረደበት እንግዴው ነበር። ዛሬ ዘመን ተቀይሮ ኦዴፓ በአዳዲስ ሃይሉና በቅንጅት በተደረገ ትግል “ አልላላክም” ሲል ጠላት ሆነ። እንግዴ ልጅ ሆነ። ውታፍ ነቃይ ተባለ። ባንዳ ተባለ። ከሃጂ ተባለ። እንደተፈጠረው እንዲጠፋ ተወሰነበት። ኦነግ በደጋፊዎቹና በመሪዎቹ ላይ የደረሰው አጸያፊ ተግባር ተዘንግቶ ኦዴፓን እንዲተካና በተራው የበኩር ልጅ እንዲሆን ደፋ ቀና ተይዟል።

ሰፊው የኦሮሞ ሕዝብ በትህነግ የደረሰበት የግፍ መአት እንዴት ይዘነጋል? መከረኛው የኦሮሞ ህዝብ በቶርቸር፣ በአልሞ ተኳሾች ግድያ፣ በእስር፣ በመሸማቀቅ፣ በስደት፣ ሃብቱን በመነጠቅ፣ ማቅ ለብሶ የቆዘመበት ዘመን ለትህነግ አይታየውም። ትህነግ ይህን ጸያፍ ተግባሩን የፈጸመው ይህ አሁን ያለው ትውልድ ፊት መሆኑንን፣ አንዳንዱም ሃዘን ገና ያልጠገገ መሆኑንን ረስቶ የኦሮሞን ሕዝብ በፈረቃ ሊነዳ እየዳከረ ነው።

የኦሮሞ ሕዝብ በውክልና እንደ ልማዱ አንጠልጥሎ ወደ አራት ኪሎ በውክልና ለመመለስ እንደ ቀድሞ በገሃድ ሳይሆን ህልሙን በውክልናና በማህበራዊ ሚዲያ ዘመቻ “ቢሉሱማውን” አፋፍሟል። አሳዛኙ ጉዳይ ይህንኑ የትህነግ “ ሴራ” በመሸከም እንወክለዋለን በሚሉት ሕዝብ ላይ ለመጫን እዛና እዚህ የሚንከላወሱ ወገኖች ጉዳይ ሆኗል። እነዚሁ ክፍሎች በስፋት ተቃውሞ እየተሰነዘረባቸውና ጥያቄ ውስጥ እየገቡ መሆኑም እየተመለከተ ነው። የኦሮሚያን ጉዳይ ከላይ አነሳሁት እንጂ በአማራ ክልልም ትህነግን “ ወግድ” ያለውን አዴፓን ለማሰወገድ ተመሳሳይ ሩጫ አለ። ሴራና የውክልና ማተራመስ!!

ትህነግ ህልመኛ ወይስ ዳግም ነጋሽ

ገና በዳዴ ሳይሄድ በየስርቻው፣ በየመዋቅሩ፣ በየቢሮው፣ በተገኘበት ሁሉ ፈንጂ የተቀበረበት የዶክተር አብይ መንግስት መዛሉን አፍቃሪ የትግራይ ህዝብ ነጻ አውጪ ግንባር / ትህነግ ደጋፊና ተከፋይ የዲጂታል ፊት አውራሪዎች እየገለጹ ነው። በተመሳሳይ ከኦሮሞና አማራ አብራክ የወጡ ወይም እንደወጡ የሚናገሩ ይህንኑ የዶከተር አብይን አስተዳደር የማዛል ዘመቻውን ዘይት እያርከፈከፉበት ይገኛሉ። አብዛኞች በማወቅም ይሁን ባለማወቅ በዘይቱ ላይ እየፈሰሱ ነው። እውን ዶክተር አብይ በትህነግ እቅድ መሰረት” ደህና ሰንብቱ” ይባሉ ይሆን?

ትህነግ እንደ ስትራቴጂ ለሚከተለው አብይን የመብላት መንገድ የአውራ ጣታቸውን እነሚቀስሩለት በይፋ የተናገሩት የመቀሌ ዩኒቨርስቲ መምህር አስመላሽ ዮሀንስ (ዶ/ር) በአማራ ክልል አዴፓ ሙሉ በሙሉ በሚባል ደረጃ ሕዝባዊ ድጋፍ ማጣቱን፣ በተመሳሳይ ኦዴፓም እንዲሁ ህዝብ እንደገፋው በጽሁፋቸው ያትታሉ። 

በምትካቸው በአማራ ክልል አብን፣ በኦሮሚያ ኦነግ ሙሉ የህዝብ ድጋፍ እንዳላቸው ያትቱና በትግራይ ትህነግ ያለተቀናቃኝ ዋንጫውን እንደሚያነሳ ያክላሉ። በውጤቱም ዶከተር አብይ ኦዴፓን ወክለው አገር መምራት የሚያስችል እድል ያጡና በዛው ያከትማልቸዋል ባይ ናቸው። 

ስለ ትህነግና ኦነግና፣ ትህነግና አብን ትሥሥር ወይም የመቆራኘት ጉዳይ ምንም ያላነሱት የህግ ምሁሩ አስመላሽ ዮሃንስ፣ ትህነግ ምርጫው እንዳይራዘም የሚወተውተው በዚህ ምክንያት መሆኑንን ያስረዳሉ። አያይዘውም በዚሁ ከላይ ባነሱት የራሳቸው ጭብጥ መነሻ ዶክተር አብይ ምርጫው እንዲራዘም ሊያደርጉ እነደሚችሉ ይሰጋሉ። እሳቸው ስጋት በገቡበት ጉዳይ ግን ዶከተር አብይም ሆነ ፓርቲያቸው ኢህአዴግ ምርጫው በታቀደለት የጊዜ ገደብ እንደሚካሄድ በተደጋጋሚ ይፋ አድርገዋል። አንዳንድ ፓርቲዎች ይራዘም የሚል ድምጽ ከማሰማታቸው በቀር። ምንም ይሁን ምን ግን እንደ እሳቸው ገለጻ ትህነግን ባይገልጹም ትንተናው ኦነግና አብን መጪውን ምርጫ ያሸንፋሉ።

ኦነግ ምርጫ ያሸንፋል ሲባል ምን ማለት ነው? የትኛው ኦነግ?

ኦነግ በኢትዮጵያ እድሜ ጠገብ የነጻ አውጪ ቡድን ነው። ሲቋቋም በሸዋ ልጆች የሚመራ የነበረ ቢሆንም ላለፉት ሰላሳ ዓመታት ግን መሪነቱን የወለጋና አካባቢው ተወላጆች ሙሉ በሙሉ በሚባል ደረጃ ተረክበው ቻርተሩን ካረቀቁ በሁዋላ አንዴ ፓርላማ፣ አንዴ ኤርትራ፣ አንዴ ጫካ እያለ እዚህ ደርሷል። ኦነግ ፖለቲካዊ ሸፍጥ ቢፈጸምበትም ጃዋርን ጨምሮ የተሳሳተ የትግል መስመር ይከተል የነበረና የከሸፈ ድርጅት እያሉ በይፋ ሲያወግዙት ነበር።

ከሽግግር መንግስቱ እንዲገፋ ተደርጎ ከአገር ከወጣ በሁዋላ ለአራትና ለአምስት ቦታ ሲከፋፈል የኖረው ኦነግ ብዙ ያልጠሩ ጉዳዮች እንዳሉበት ራሳቸውን የኦሮሞ ተቆርቋሪ አድርገው የሚጠሩ አካላት የሚናገሩት ጉዳይ ነው። እነዚህ ጉዶች ከምርጫ መቃረብ ጋር ይፋ እንደሚሆኑ ግምት አለ። ለሁሉም ግን አሁን የተፈጠረውን ሰላማዊ የፖለቲካ ትግል ተከትሎ ወደ አገር ቤት የገቡት የኦነግ ክፍሎች አራት ናቸው።

ኦነግ የተባበረው የኦሮሞ ነፃነት ግንባርን  /ኦነግ ዩኒት/ በአቶ ገላሳ ዲልቦ የሚመራ፣ የሽግግር ኦሮሞ ነፃነት ግንባርን / ኦነግ ትራንዚሽን/ አባነጋ ጃራ የሚመራ፣ ኦነግ ሸኔ በአቶ ዳውድ ኢብሳ የሚመራና በብርጋዴል ጄነራል ከማል ገልቾ የሚመራው ኦሮሞ አንድነት ነፃነት ግንባር የሰላማዊ ትግል ጥሪውን አክብረው ወደ አገር ቤት ቢመለሱም፣ አቶ ዳውድ የሚመሩት ኦነግ ሸኔ ታቅዶ ይሁን አይሁን መረጃ ማቅረብ ባይቻልም ለሶስት መከፈሉ ይታወቃል። መሳሪያ ያነሱና ጫካ የገቡ፣ ከውጭ ሆነው ጫካ ያለውን ሃይል የሚደጉሙ አመራሮችና በዴሞክራሲያዊ መንገድ አገር ቤት ቁጭ ብሎ የሚንቀሳቀሰው ክፍል ናቸው ክፍልፋዮቹ። ይህንን ክፍልፋይ የታቀደና ማዕከላዊ መንግስቱን ከምርጫ በፊት አስገድዶ ስልጣን ለመቀማት የሚደረግ የትግል ስልት እንደሆነ የሚገልጹ ቢኖሩም፣ አቶ ዳውድ ” ጫካ ያለውን ቡድን አላውቀውም” ይሉታል።

ይህ በንዲህ እንዳለ በጠቅላይ ሚኒስቴር አብይ የሚመራው ኦዴፓ  በአባ ነጋ ከሚመራው የሽግግር ኦሮሞ ነፃነት ግንባርን / ኦነግ ትራንዚሽን/ ጋር ወደ ውህደት የሚወስዳቸውን ስምምነት ከስምንት ወር በፊት መፈራረማቸው አይዘነጋም። ይህንን የሚያስታውሱና ለጉዳዩ ቅርብ የሆኑ አካላት፣ የገላሳ ዲልቦና የአባ ነጋ ስምምነት ሲጠናቀቅ፣ ኦዴፓ ውህደት ለማድረግ እየተጠባበቀ መሆኑን ይናገራሉ። እንደተባለው አባ ነጋና ገላሳ ዲልቦ የሚመሩት ኦነግ ስምምነቱን ፈጽሞ፣ ጠቅላላ ጉባኤ አካሂዶ፣ ለምርጫ ቦርድ የኦነግ ስም እንደሚገባው አስታውቆ አመልክቷል። 

አቶ ዳውድ የሚመሩት ኦነግ ሸኔም በተመሳሳይ ኦነግ ስሙ መሆኑንን ጠቅሶ ለምርጫ ቦርድ አስገብቷል። ይህንኑ አስመክቶ ለቢቢሲ ሲናገሩ  “… የተለያዩ የፖለቲካ ድርጅቶች ጋር አንድ ለመሆንና ለመዋሃድም እየሰራን ነው ኦነግን በተመለከተ ግን እኛም የኦሮሞ ሕዝብም የሚያውቀው አንድ ኦነግ ነው ያለው” ብለዋል። አባ ነጋ በበኩላቸው  “ምርጫ ቦርድ መመዝገብ ሕጋዊ ግዴታችን ነው። መመዝገብ ስላለብንም ነው ሂደቱን የጀመርነው። ኦነግን አንድ ድርጅት የማድረግ ሥራ ግን የፖለቲካ ሥራ ነው። እየተነጋገርንበት ነው። በቅርቡ ጨርሰን አንድ ንግግር እናደርገዋለን” የሚል ምላሽ ሰጥተዋል።

ሁለቱም እንደሚሉት አንድ የመሆን ንግግር አለ። ግን በየፊናቸው “ኦነግ” የሚለውን የመታገያ ስም የግላቸው ለማድረግ ማመልከቻ አስገብተዋል። በ1991 ኦነግ የሚለውን ስም አስመዝግበው ሲጠቀሙበት የነበሩት አቶ ገላሳ ዲልቦ እንደሆኑ የሰነድ ማስረጃዎች ያሳያሉ። በዚሁ የስም ጉዳይም በአሜሪካን አገር ፍርድ ቤት የደረሰ ክርክር ተደርጎ አቶ ገላሳ ዲልቦ ከብሄራዊ ምርጫ ቦርድ በተሰጣቸው ሰነድ አማካይነት አቶ ዳውድን በፍርድ ቤት መርታታቸውም የሚታወስ ነው።

እንግዲህ የኦነግን የባለቤትነት ጥያቄ የያዘው ምርጫ ቦርድ ጉዳዩን ይዞ እየመረመረው መሆኑንን አስታውቋል። ዛሬ ጥያቄ ያቀረበው የአባ ነጋ ጅራ ኦነግና የገላሳ ዲልቦ ኦነግ በኦፊሴል በመዋሃዳቸና አባ ነጋ ሊቀመንበር፣ የቄሮ መሪ የነበረው ወጣት ምክትል ሊቀመንበር መደረጋቸው ይፋ ሆኗል። በዚህ መነሻ ምርጫውን የትኛው ኦነግ በበላይነት ያጠናቅቀዋል? የሚለው ጉዳይ ከወዲሁ ፍንጭ እያሳየ መሆኑንን ስለ ጉዳይ ዝርዝር መረጃ ያላቸው ከወዲሁ እየገለጹ ነው።

እዚህ ላይ የሚነሳው ጠረጴዛ ላይ ቁጭ ያለው የኦዴፓና የአባ ነጋ ጅራ ኦነግ የውህደት ስምምነት ጉዳይ ነው። አባ ነጋ ጅራ በወለጋና አካባቢው፣ እንዲሁም በሃረርጌ ድጋፍ እንዳላቸው ከሚነገርላቸውን ገላሳ ዲልቦ ጋር ውል ፈጽመውና ጡንቻ ጨምረው ወደ ኦዴፓ ስምምነታቸው ፊታቸውን ካዞሩ፣ ምርጫ ቦርድ ቀድመው ለተመዘገቡትና በሰነድ ለሚታወቀው የገላሳ ዲልቦ አካል ለሆነው የአባ ነጋ ኦነግ ፈቃዱን ከሰጠ፣ ኦዴፓና ኦዴፓ ጠረጴዛ ላይ ያለውን ስምምነት ፈጻጽሞ በኦነግ ስም ወደ ምርጫ የሚገባበት እድሉ ከደጅ ነው።

በአባ ነጋ ጅራ የሚመራው ኦነግ አመራር የሆኑ እንዳጫወቱኝ ከሆነ በድፍን ሸዋ፣ በወለጋና አካባቢው፣ በኢሏባቦር፣ በሃረርጌ፣ በአርሲ፣ በጅማ፣ በባሌ አብዛኛው ክፍል ፓርቲያቸው አብላጫ በቂ ድምጽ እንደሚያገኝ ባይጠራጠሩም፣ ኦዴፓ ሸዋ፣ ጀማ፣ አርሲ፣ ምዕራብ ሃርርጌ እንዲሁም በበርካታ ቦታዎች እንደሚመረጥ ግምታቸው ሰፊ ነው። እናም የሁለቱ ጥምረት በኦሮሚያ በቀላሉ መንግስት መመስረት የሚያስችል ይሆናል። አሁንም ቢሆን እነ ጀነራል ሃይሉ ጎንፋን ጨምሮ ፓርቲያቸው ከኦዴፓ ጋር በሰላም እየሰሩ መሆናቸውን እንደ ማስረጃ አንስተውልኛል።

ስለ ትህነግ እምነትና ከላይ በመግቢያው ስለተገለጸው የመቀሌ ዩኒቨርስቲ ምሁር ትንተና በድርጅታቸው ስም ሳይሆን በግል ” በአባ ነጋ ጅራና በገላሳ ዲልቦ የሚመሩት ድርጅቶች/ አሁን አንድ ሆነዋል/ ወደ ቀድሞው መንገድ አያዩም። እንይም ቢሉ ምክር ቤቱና አባላቱ አይፈቅዱም። ኦዴፓን ገፍቶ ከትህነግ ጋር የሚዶልቱበት ምድራዊ መሰረት የለም። ጉዳዩ በኦሮምኛ እንደሚባለው ዝንጀሮ ቁጫጭን ወሃ ቅጂልኝ ገላዬን ልታጠብ እንዳለችው ነው” ሲሉ አሰተያየታቸውን አካፍለውኛል። አያይዘውም ” የኢትዮጵያ እስር ቤቶች ቋንቋ ሙሉ በሙሉ ኦሮምኛ የሆነበትን ወቅት እንዲሁ በቀላሉ መርሳት የሚቻል አይሆንም ” ሲሉ ከትህነግ ጋር የጎን የሚያሴሩትን ወርፈዋል። እኚሁ ወዳጄ እንዳሉ አስተያየቱ የግላቸው ቢሆንም የፓርቲው አቋም እንደሆነ ጠቁመው ከምኞት ይልቅ በትግራይም በተመሳሳይ አማራጭ ሃሳቦች በነጻነት ለህዝብ እንዲቀርብ እንደ ምሁር ቢሰብኩ እንደሚሻል መክረዋቸዋል። 

ትህነግ በአማራ ክልል – የሴራ ፖለቲካ 

የአማራ ክልል ፖለቲካና ውስጣዊ ግጭት የሚያስፈራቸው ጥቂት አይደሉም። የአማራ ክልል መሪዎች ላይ እስካሁን በምርመራ ይፋ ያልሆነ ግድያ ሲፈጸም የአዴፓ ጉዳይ እንዳከተመ ተደርጎ መወሰዱ የሚታወስ ነው። ይህንኑ ግድያ አስመልክቶ በእሽቅድድም የተቃወመውና ኦዴፓን ተጠያቂ ያደረገው የትግራይ ህዝብ ነጻ አውጪ ግንባር መሆኑ የበርካታ በሳል ፖለቲከኞችን ቀልብ መሳቡም የሚታወቅ ነው።

“እረኛውን ምታ በጎቹ ይበተናሉ” የሚል መርህ አንግቦ የሚንቀሳቀሰው ዲጂታል ወያኔ ያሰማራቸው የማህበራዊ ገጽ ሰራዊቶቹ በተለያየ ስም ይህንኑ ግድያ አስመልክቶ የሚያራቡት ዜናና ዓላማ ያለው ቅስቀሳ ያበሳጨው አዴፓ በታሪኩ ተሰምቶ የማያውቅ እንደ መብረቅ የታየ የምላሽ መግለጫ ሰጥቶ ነበር። በምላሹ “ ተገንጣይ” እያለ የከረመ የብሶት ስሜቱን ያወረደው አዴፓ የክልሉን ሰላም ማረጋጋቱን ቢያስታውቅም ዛሬም ድረስ ችግሩ እበራፍ ላይ መሆኑንን በርካቶች ይመሰክራሉ።

ዛሬ በአማራ ክልል ጎጃሜ፣ ጎንደሬ፣ ሸዌ፣ ወሎ፣ ወዘተ እየተባለ የሚሰራጨው የመከፋፈል ስልት ሰፊውን አማራ ለማዳከምና አሽመድምዶ ለመጣል ሲሆን፣ ዘመቻው በድርጅት ደረጃና በበጀት የሚደገፍ እንደሆነ ቅርበት ያላቸው ወገኖች ይናገራሉ። እንደውም በአማራ ክልል “ሴራችን ተሳክቷል” የሚል ድምዳሜ ላይ እንደተደረሰ መረጃ ያላቸው እየተነፈሱ ነው። እውነታው ይህ ቢሆንም በስመ አማራ ስም የሚንቀሳቀሱ ግን ሊሰሙና መጪውን ጊዜ ለመመልከት ሲታትሩ አይታዩም። የድርሻዬን በሚል አይነት ክልሉን ወደውም ይሁን ተገዝተው እየናጡት ነው። በዚህም ሳቢያ ሕዝቡ ማግነት የሚገባውን ከማግኘት ይልቅ ያለውን እያጣ ነው።

አማራን እንወዳለን የሚሉም ሆነ ለአማራ እንታገላለን የሚሉ ወገኖች “ ሴራውን” ማጤን አልቻሉም የሚሉ ወገኖች፣ የአማራ ክልል ነዋሪዎች፣ አክቲቪስቶች፣ ፖለቲከኞች በአቡሸማኔ ላይ ተቀምጠው የሚጋልቡትን የፖለቲካ ግልቢያ ትተው በሰላማዊ መንገድ ከአዴፓ ጋር መምከሩ እንደሚሻላቸው ይመክራሉ። ለጊዜው ዝርዝር ውስጥ መግባት ባያስፈልግም አሁን አማራ ክልል ውስጥ እየጨሰ ያለው የቀውስ ረመጥ መላ ካልተባለ አድሮ ይህንን ትልቅ ሕዝብ ለውርደትና የሚዳርግ፣ እስከወዲያኛው ከማይወጣው ችግር ውስጥ የሚቀረቅር አደጋ እንደሚያስከትል ከግምት በላይ መናገር ይቻላል።

በኦሮሚያ ተቃዋሚዎችን ለማስማማት ሩጫ አለ። በአማራ ክልል ግን ሁለት ድርጅት ማስማማት ያልቻሉ የክልሉ ተጽዕኖ ፈጣሪዎች ሁሉን ትተው አቅማቸውን ሁሉ ተጠቅመው አዴፓንና አብን ወደ አንድ መድረክ የማምጣት ስራ እንዲያከናውኑ የሚመክሩ ጥቂት አይደሉም። አብንም ከምስረታው ጀምሮ የሚነሳበትን የንክኪ ጥያቄ ግልጥ በማድረግ፣ ችግር ያለባቸው አካላት ካሉ በመለየት ራሱ አጽድቶ ሊቀርብ እንደሚገባ የሚጠቁም በርካታ ናቸው።

በአማራ ክልል አዴፓ “ ሞቷል” በሚል ግምገማ በባዶ ቤት ለመፈንጨት ይቻል ዘንድ ሴራው ውስጥ ውስጡ እየጋመ እንደሆነና፣ ይህንኑ ሴራ ለመተግበር የሚልከሰከሱ መኖራቸውን የሚጠቁሙ “ የአማራን ሕዝብ እንወዳለን፣ ከክፉም እንታደጋለን የሚሉ ሁሉ ቸግሮች በሰላም ተፈተው በክልሉ አስተማማኝ ጸጥታ እንዲሰፍን ቅድሚያ እንዲሰጡ አብዝተው የሚወተውቱ “ ወንድማማቾች የውስጥን ችግራቸውን በሰላማዊ መንገድ መፍታት ያልቻሉበት ምክንያት አይገባንም” ሲሉም ይደመጣሉ።

ትህነግ ዛሬ ላይ መገንጠልን እንደማስፈራሪያና እንደ አማራጭ አስቀምጦ፣ 300 ሺህ በላይ ሰራዊት ለክፉ ቀን አዘጋጅቶ፣ በበጀትና በመሳሪያ ራሱን አደራጅቶ፣ ጽንፈኞችን እየመራ ወደ አራት ኪሎ ለመጋለብ ያስቀመጠው አጭር ጊዜ አንድ ዓመት እንደሆነ በዲጂታል ሰራዊት አመራሮቻቸው ይፋ እየተናገሩ ነው። ለማንኛውም በሚል የአየር ትራንስፖርትም ለመጀመር ዝግጅታቸውን አተናቀዋል። አማራውን በተመሳሳይ በሴራ አባልተው ሽባ ለማድረግ ክንዳቸውን የሚችሉት ድረስ እየዘረጉ፣ እያስታጠቁና በማንነት ሰበብ እያሳመጹ እንደሆነ የክልሉ አመራሮች ይፋ ያደረጉት፣ ሕዝብም የሚያውቀው ሃቅ ነው። ግና አማራ ክልል ዛሬም እርስ በርሱ ይናከሳል።

መጨረሻው

ኢህአዴግ ወደ አንድ ፓርቲነት እንዲመጣ የተወሰነው ከዛሬ አስራ ሶስት ዓመት በፊት ቢሆንም በትህነግ ተንኮል ምክንያት እውን ሳይሆን ቀርቷል። ዛሬ ዶክተር አብይና መሰሎቻቸው አጋር ፓርቲዎችን ይዘው ኢህአዴግን ወደ አንድ ፓርቲነት ለማሸጋገር እየሰሩ ነው። ከአንድ አጋር ክልል ውጪ የተቀሩት ሃሳቡን ተቀብለውታል። እናም ትህነግ ከኢህአዴግ ህብረት መውጣት የራሱ ውሳኔ ይሆናል።

አሁን ባለው አካሄድ ኢህአዴግ በስም ደረጃ እንጂ በገቢር እንደሌለ የሚሰብኩት የትህነግ ሃላፊዎችና ደጋፊዎች መነሻ ፍርሃታቸው እነሱን ያገለለ አንድ ትልቅ አገራዊ ፓርቲ እንዳይቋቋም ነው። በዚም ምክንያት ኦሮሚያ የአቶ ዳውድ ኦነግ፣ በአማራ አብን፣ ሲዳማን ከደቡብ ወደ ስልጣን እንዲመጡ ስራውን እየሰራ ነው። ምርጫው እንዳይራዘምም ከዓመት በፊት በሚዲያና በተገኘው መድረክ ሁሉ ያለማቋረጥ እየወተወተ የቆየው ለዚሁ ህልሙ ነው።

እንደ ትህነግ ምኞት ኦዲፒንና አዴፓን ድሮ የሰራቸው እሱ ስለሆነና ዛሬ እነሱ ህብረት ፈጥረው መሪ ሲሆኑ በገዛ ፈቃዱ ካሰበው የጊዜ ቀመር ውጭ ወደ ትግራይ በማፈግፈጉ በእልህ ሊያጠፋቸው ወስኗል። በዚም መሰረት የሴራ ፖለቲካ በማምረትና ሴራ አስፈጻሚዎችን በማሰማራት መሪዎችን ከህዝብ መነጠል፣ ይጠቅሙናል ካላቸው ጋር በጎንና በገሃድ መሸረብ፣ ላይ ተጠምዶ እየታየ ነው።

ከዚህም በላይ በኢህአዴግ ደረጃ ስብሰባ ተቀምጦ የሚወስናቸውን ጉዳዮች ሲተገበሩ አደባባይ እየወጣ መኮነን፣ ማሳጣት፣ መስመር ማሳት ላይ የተጠመደው ከላይ ያቀደውን እቅዱን ለማስፈጸም ካለው ጉጉት የተነሳ ነው። የልዩነት ሃሳቦችን የሚያበዛው እንደ አማራጭ ያስቀመጠው የመገንጠል የቆየ እቅዱን ኢትዮጵያዊው የትግራይ ሕዝብ እንዳይቃወም ለማድረግ ሲል እንደሆነም በስፋት አስተያየት ይሰጣል።

እስከ ምርጫ ቀን የተቆረጠላቸው ዶከተር አብይ ትህነግን ወደ ስልጣን ያመጡት ታላላቆቹ አገራት ከጎናቸው ናቸው። አብረዋቸው እንደሆኑ በይፋ እየገለጹ ነው። አንዳንድ ትርጉማቸው የማይገባ ውልም እየተፈራረሙ ነው። ከሁሉም በላይ ግን በኦሮሚያ የአባነጋ ጅራና የገላሳ ዲልቦ ጥምረት ዝም ብሎ የተደረገ እንዳልሆነ የሚናገሩ ወገኖች “ ለትህነግ ህልም መፍትሄ ተበጅቷል” ሲሉ ይደመጣሉ።

የዳውድ ኢብሳ ሸኔ የተወሰነ ድምጽ ቢያገኝ ከሶስቱ የጥምረት ድምጽ ሊበልጥ ስለማይችል፣ በከፊል  ከአንድ አጋር ክልል በቀር ሁሉም የዶክተር አብይ ደጋፊ መሆናቸው አንድ ላይ ሲደመር መንግስት ለመመስረት እንደሚያስችላቸው በስሌት ደረጃ ያሰሉ ይመሰክራሉ። እናም ትህነግ ይህንን ስለሚረዳ የሴራ ፖለቲካው ላይ እስከ መጪው ምርጫ ድረስ ሙጭጭ ብሎ እንደሚቀጥል ይታመናል። ለክ አሁን ገዳዩ የትምህርት ፖሊሲ ሲቀየር “ አሃዳዊ “ ብሎ ስም ፈጥሮ እንደሚጮኸው!!

በነገራችን ላይ የትምህርት ፖሊሲው 6፤2፤4 ሆነ ተባለ እንጂ በክሎች መብት ጉዳይ የተቀየረ ህገ መንግስታዊ ለውጥ ሳይኖር “አሃዳዊ የትምህርት ፖሊሲ ” እንደተነደፈ አድርጎ መቀስቀስ የዚሁ የማተራመስ እቅድ አካል ካልሆነ በቀር ሌላ ምንም ስም ሊሰጠው አይችልም። መነሻው አማራንና አማርኛን ጥላቻ ብቻ ነው። ይህንን የሚረዱ ወገኖች በተለይም የአማራ ክልል ጉዳይ ያገባናል የሚሉ በዚህ የጥላቻ ጥግ መሰረት ራሳቸውን ፈትሸው ከትህነግ ጋር የሚዳሩትን ድሪያ በማቆም ለክልሉ ሰላም ቢሰሩ ደግ ይሆናል። ዛሬ አማራ ክልል ስልጣን ሳይሆን መረጋጋትና አስተማማኝ አንድነት ቅድሚያ ጉዳይ ነውና።

አዴፓም ቢሆን ያለበትን ችግር በመቅረፍ፣ አግባብነት ከጎደለው እስርና ማሳደድ ተቆጥቦ ወደ ጠረጴዛ ዙሪያ ሊመጣና አብሮ ለመስራት ያለውን ፈቃደኛነት ሊያሳይ ይገባል። ይህ ሲባል ግን የተገደሉትን ምርጥ የአማራና የኢትዮጵያ ልጆች ደም ህግና ደንብ በሚፈቅደው መሰረት መርምሮ ከዳር ሊያደርስ ግድ ነው። የውክልና ዓላማ የሚያራምዱ ማናቸውም ቢሆኑ የሕዝብ ጠላቶች ናቸውና።

አሳዬ በላይ አዲስ አበባ ድርጅት ዘርፍ 

ዝግጅት ክፍሉ – ይህ ጽሁፍ የጸሃፊው እምነት ብቻ ነው